लोकतान्त्रिक गठबन्धन जित नजिक : बानियाँ 

File Photo

३ मंसिर, हेटौँडा । आसन्न निर्वाचनमा मकवानपुरको क्षेत्र नम्बर २ को २ नम्बर प्रदेशसभा उम्मेदवार इन्द्रबहादुर बानियाँले जिल्लामा लोकतान्त्रिक गठबन्धन जितको नजिक रहेको दावी गरेका छन् । 
राक्सिराङ–४ मा आईतबार भएको कोणसभा तथा प्रचारप्रसार सम्पर्क कार्यालय उद्घाटनमा उनले पछिल्लो समय काँग्रेस प्रवेश गर्ने क्रम बढेको र जनताले समेत लोकतान्त्रिक गठबन्धनका उम्मेदवारलाई जिताउन चाहेको उनले बताए । काँग्रेस मकवानपुर सभापति समेत रहेका बानियाँले लोकतान्त्रिक गठबन्धनका उम्मेदवारको जितले मात्र मकवानपुरसहित देशको मुहार फेरिन सक्ने दावी गरे । 
‘मुलुकमा भएका सबै परिवर्तन र आन्दोलनहरु काँग्रेसको नेतृत्वमा मात्रै सफल भएको छ । यस्तै विकास निर्माणमा पनि काँग्रेसले अगुवाई गरेको जनताले बुझेकै छन’, उनले भने, ‘हामी जे बोल्छौँ त्यो गछौँ । कम्युनिष्टले जस्तो काँग्रेसका नेताहरुले फोस्रा भाषण गर्ने अनि आश र त्रास बाँड्ने काम गर्दैनौँ ।’ 
काँग्रेसले चिल्ला र झुटा भाषणलाई भन्दा जनताको कामलाई प्राथमिकता दिएकै कारण विषम् परिस्थितीहरुमा समेत काँग्रेसलाई जनताले माया गरिरहेको दावी गरे । आफ्नो जिविका चलाउनको लागि ठेकेदारी काम गर्दै आएको र जनतालाई दुःख दिने काम अहिलेसम्म नगरेको बानियाँले बताए । 
कार्यक्रममा काँग्रेस जिल्ला सचिव बुद्ध लामा, ४ नम्बर क्षेत्रीय सभापति लोक मुक्तान, राक्सिराङ गाउँपालिका अध्यक्ष राजकुमार मल्ललगायतले साविकको मकवानपुर क्षेत्र नम्बर २ र ४ को विकासको लागि प्रदेशसभामा इन्द्र बानियाँ र प्रतिनिधीसभामा महालक्ष्मी उपाध्याय डीनालाई जिताउनु आवश्यक रहेको बताएका थिए ।
माओवादी जिल्ला सदस्यसहित १२१ काँग्रेसमा
कार्यक्रममा माओवादी केन्द्रका जिल्ला सदस्य विश्वराज थिङ र नेकपा एमालेका जीवन थिङसहित एकसय २१ जना काँग्रेसमा प्रवेश गरेका छन् । उनीहरुलाई प्रदेशसभा सदस्यका उम्मेदवार इन्द्र बानियाँले टीका र माला लगाएर काँग्रेसमा स्वागन गरेका हुन् । नव प्रवेशीलाई योग्यता र क्षमताको आधारमा पार्टीले स्थान दिँदै जाने बानियाँले आश्वासन दिए । नव प्रवेशी थिङले राक्सिराङमा माओवादी पार्टी संरक्षण गरेर बसेको बताउँदै अहिले वाम गठबन्धनको नाममा पार्टी समाप्त पार्ने र कुर्सीको लागि नेताहरुले जे पनि गर्न पछि नपरेकोले माओवादी छोडेको बताए । 
मकवानपुरको विकासको लागि इन्द्र बानियाँ र महालक्ष्मी उपाध्याय डीनालाई जिताउनको लागि आफूसहित एकसय २१ जना काँग्रेसमा गोलबन्द भएको उनले बताए । विकाशको लागि सक्षम, इमान्दार एवम् मन्त्री बन्न सक्ने हैषियतको नेताहरु मकवानपुरले पाएको भन्दै थिङले लोकतान्त्रिक गठबन्धनका उम्मेदवारलाई जिताउन आजैदेखि लागिपर्ने घोषणा गरे ।