महिलालाई निशुल्क एम्बुलेन्सको व्यवस्था गरिनेः काँग्रेस नेतृ उपाध्याय

 ५ मसिर, हेटौँडा । नेपाली काँग्रेसकी केन्द्रीय सदस्य एवं मकवानपुरको प्रतिनिधिसभा क्षेत्र नम्बर २ का उम्मेदवार महालक्ष्मी उपाध्याय डीनाले प्रजातन्त्र पुनसर््थापनापछि मकवानपु्रमा बामपन्थीहरुले निरन्तर जित्नै आएपनि विकास नभएको बताउनु भएको छ ।
संयुक्त लोकतान्त्रिक गठबन्धनले आज भीमफेदी गाउँपालिकाको विभिन्न स्थानमा आयोजना गरेको कार्यक्रममा बोल्दै उहाँले २०४८ सालदेखि संसद र स्थानीय निकायमा बामपन्थीले जित्दै आएपनि विकास नगरेको बताउनुभयो ।
उहाँले काँग्रेसले सुरु गरेको भीमफेदीको सोलाभञ्ज्याङ्ग जाने सडकको स्तरोन्नती र सुत्केरी महिलालाई निशुल्क एम्बुलेन्सको व्यवस्था गर्ने बताउँदै निर्वाचनपछि लोकतान्त्रिक गठबन्धनले निरन्तरता पाउने बताउनुभयो ।
कार्यक्रममा नेपाली काँग्रेस प्रचार विभाग सदस्य तेजप्रकाश पण्डितले काँग्रेस बाम गठन्धनसँग नआत्तिएको बताउँदै मधेशी दललाई मूलधारमा ल्याउन विरोध गर्ने नेकपा एमालेसहितको गठबन्धनले अहिले शासकीय स्वरुप परिवर्तन गर्न दुई तिहाईको कुरा गरेकोले आशंका सिर्जना भएको बताउनुभयो ।
कार्यक्रममा प्रदेश सभा सदस्य उम्मेदवार यतिराज सापकोटा, समानुपातिक उम्मेदवार पवित्रा विक, काँग्रेस हेटौँडा उपमहानगर समितिका सभापति आनन्दराम पराजुली, २ नम्बर क्षेत्रका निवर्तमान सभापति ईश्वर पौडेल, महाधिवेशन प्रतिनिधि मोमलाल दोङ्ग, शान्ता विक, भीमबहादुर गोम्जा, अर्जुनप्रसाद पुडासैनी, विनिता आचार्यलगायतले बोल्नु भएको थियो ।
नेपाली काँग्रेस भीमफेदी गाउँपालिकाका सभापति जब्बरसिं वाइवाको अध्यक्षतामा छबेली, सोलाभञ्ज्याङ्ग र सुपिङ्गमा घरदैलो तथा कोणसभा सम्पन्न भएको हो ।