हेटौँडा–१७ को जनप्रिय माविलाई सञ्चार सामग्री हस्तान्तरण

१२ माघ, हेटौंडा । बागमती प्रदेशका श्रम रोजगार तथा यातायातमन्त्री एकालाल श्रेष्ठले जनप्रिय मावि हेटौँडा १६ लाई स्टुडियो मिक्सचर, माइकलगायतका सञ्चार सामग्री बिहीबार हस्तान्तरण गरेका छन् । 
‘गल्ली गल्ली’ ललितपुर र ‘मेरो गाउँ– सिकाइ केन्द्रित गाउँ’ परियोजनाले जनप्रिय माविमा सञ्चालन गरेको अन्तर्क्रिरया कार्यक्रममा श्रेष्ठले विद्यालयमा नवनिर्मित स्टुडियोका निम्ति सामग्री हस्तान्तरण गरेका हुन् । 
मन्त्री श्रेष्ठले जनप्रिय माविका मिडिया संयोजक सुनील गौतमलाई उक्त सामग्री हस्तान्तरण गरेका हुन्। मोबाइल आर्टस् फर पिस र जनप्रिय माविको सहकार्यमा जनप्रियमा स्टुडियो निर्माण गरिएको म्यापका जिल्ला फोकल पर्सन युक्तलाल विश्वकर्माले जानकारी दिए ।
उक्त अवसरमा मन्त्री श्रेष्ठले सामुदायिक विद्यालयअन्तर्गत देशकै पहिलो मिडिया कक्ष र स्टुडियो स्थापना गरी सञ्चालनमा ल्याएको जनप्रिय माविले विद्यार्थीहरूमा प्रविधिमैत्री र जीवनोपयोगी सीप प्रदान गर्नेमा आफू विश्वस्त रहेको बताए । 
‘गल्ली गल्ली’ ललितपुर र ‘मेरो गाउँ–सिकाइ केन्द्रित गाउँ’ परियोजनाले सञ्चालन गरेको अन्तरक्रिया एवं कार्यपत्र प्रस्तुत कार्यक्रममा विद्यालय शिक्षाबाट विभिन्न कारणले छुटेका बालबालिकाको सिकाइमा देखिएका समस्यामाथि मन्त्री श्रेष्ठले ठोस पहल गर्नेसमेत प्रतिबद्धता गरेका छन । 
परियोजनाले सुर्खेत, सर्लाही र मकवानपुर गरी ३ वटा जिल्लामा कार्यक्रम गर्दै आएको छ । परियोजनाका तर्फबाट जीवन शर्माले मन्त्री श्रेष्ठलाई कार्यपत्रसमेत पेस गरेका थिए ।
यस्तै, कार्यक्रमका विशेष अतिथि बागमती प्रदेशकी प्रदेस सभा सदस्य भारती पाठकले शिक्षामा देखिएका यस्ता खाले सिकाइ समस्यालाई अनुसन्धानका माध्यमबाट तथ्य प्रस्तुत गर्न सकेकोमा परियोजनालाई धन्यवाद दिइन् ।
उनले प्रदेश तहबाट मात्र नभई संघीय सरकारकै समेत ध्यान जानुपर्ने विषयमा आफ्नो क्षेत्रबाट सक्दो पहल गर्ने प्रतिबद्धता व्यक्त गरिन् । शिक्षा क्षेत्रको सुधारका लागि प्रदेश तहबाट बन्नुपर्ने ऐन कानुनमा आफू गम्भीर भएर लागिपर्ने प्रदेश सदस्य पाठकको भनाइ छ । 
कार्यक्रममा हेटौँडा उपमहानगरपालिका वडा नं १५ का वडाध्यक्ष सुनील मोक्तान, शिक्षकहरू डा. विजय नेपाल, केशव सञ्जेल, रमेश रिजाल, उमा श्रेष्ठ, सरोकारवाला अभिभावक तथा स्थानीय बुद्धिजीवी एवं सरोकारवालाको उपस्थिति रहेको थियो ।