मकवानपुर गोल्डकप: मकवानपुर ११ विजयी

२८ माघ हेटौंडा । शनिवारबाट बागमती प्रदेशको राजधानी हेटौंडामा सुरु भएको पाँचौ संस्करणको स्थानीय तह सहीद स्मृति मकवानपुर गोल्डकप फुटबल प्रतियोगितामा स्थानीय टिम मकवानपुर ११ ले विजयी सुरुवात गरेको छ ।
हेटौंडा ५ स्थित पिप्ले–क्याम्पा रंगशालामा सुरु भएको प्रतियोगिताको पहिलो खेलमा स्थानीय टिम मकवानपुर ११ ले मोफसलको टिम नव जनजागृति क्लव सिमरा, बारालाई हराउँदै विजयी सुरुवात गरेको हो ।
मकवानपुरले सिमरालाई २–० गोल अन्तरले हराएको हो । मकवानपुरको जितका लागी प्रितम स्याङ्वो र फागुराम चौधरीले एक एक गोल गरे । दुबै गोल पहिलो हाफमा संभव भएको थियो । स्याङ्वोले खेलको पहिलो हाफको १२ औं र चौधरीले पहिलो हाफको अन्तिम मिनेटमा गोल गरेका हुन् । 
शनिवारको खेलको म्यान अफ दि म्याच मकवानपुर ११ का विदेशी खेलाडी एल्यु घोषित भए उनले १० हजार नगद सहित ट्रफि प्राप्त गरेका छन् । आइतबारको खेल विभागीय टोली ए.पि.एफ. क्लब र सातदोवाटो ललितपुरबीच हुने आयोजकले जनाएको छ  ।
यसबर्ष स्थानीय टिम मकवानपुर ११ सहित ७ वटा ‘ए’ डिभिजन क्लब, एउटा विदेशी टिम र ३ वटा मोफसलका टिमहरुको सहभागिता रहेको छ  । प्रतियोगिताको विजेताले १५ लाख र उपविजेताले १० लाख रुपैयाँसहित ट्रफी, मेडल र प्रमाणपत्र प्राप्त गर्ने छन् । 
यस्तै प्रतियोगिताको सवोत्कृष्ट खेलाडीले बुलेट मोटरसाइकल र विधागत उत्कृष्ट खेलाडी तथा प्रशिक्षकले जनही नगद २५ हजार रुपैयाँसहित ट्रफी प्राप्त गर्ने आयोजकले जनाएको छ  ।