मकवानपुर गोल्डकपः हिमालयन शेर्पा क्वार्टरफाइनलमा

३ फागनु, हेटौंडा । सर्लाहीको बागमती युवा क्लवलाई हराउँदै ए डिभिजन टोली हिमालयन शेर्पा क्लव यहाँ जारी पाँचौ स्थानीय तह सहिद स्मृति मकवानपुर गोल्डकपको क्वार्टरफाइनलमा प्रवेश गरेको छ । 
मंगलबार भएको खेलमा बागमतीलाई २–१ गोलले हराउँदै शेर्पाले अन्तिम ८ मा स्थान बनाएको हो । शेर्पाका लागि ३८ औं मिनेटमा विदेशी खेलाडी यामीले गोल गरेका थिए । 
यस्तै ६३ औं मिनेटमा शेर्पाले अग्रता दोब्बर पा¥यो । कप्तान दिपेश श्रेष्ठले निकालेको पासलाई नियन्त्रणमा लिँदै बागमतीका गोलरक्षक अनिष महतो अघि बढेको अवस्थामा निशान लिम्बुले सहजै गोल गरेका हुन् । 
खेलको ६५ मिनेटमा भने बागमतीले अग्रता घटायो । शेर्पाका गोलरक्षक किशोर गिरीबाट रिबाउण्डमा आएको बललाई सनम घिमालले गोल गरेका हुन् । दोस्रो हाफमा मैदान प्रवेश गरेका विजय घलानको लामो प्रहारलाई शेर्पाका गिरीले पञ्च गरेका थिए । सोही बललाई घिमालले गोल गरेका हुन् । 
खेलमा शेर्पाका निशान लिम्बु म्यान अफ द म्याच भए । उनले नगद १० हजार रुपैयाँसहित ट्रफी प्राप्त गरे । जारी प्रतियोगितामा बुधबार क्यामरुनको एभिनियर एफसी र वीरगञ्ज युनाइटेडको खेल हुनेछ । 
यही फागुन १० गतेसम्म सञ्चालन हुने प्रतियोगिताको विजेताले १५ र उपविजेताले १० लाख रुपैया“ प्राप्त गर्नेछन् । सर्वोत्कृष्ट खेलाडीलाई रोयल इन्फिल्ड (बुलेट बाइक) को व्यवस्था गरिएको छ भने विधागत उत्कृष्ट खेलाडी तथा प्रशिक्षकले जनही नगद २५ हजार रुपैयाँसहित ट्रफी प्राप्त गर्नेछ ।