मकवानपुर गोल्डकपको सेमिफाइनल समिकरण पुरा

७ फागुन, हेटौंडा । मकवानपुर जिल्ला फुटबल संघको आयोजनामा जारी पाँचौ संस्करणको सहिद स्मृति स्थानीय तह अन्तर्राष्ट्रिय मकवानपुर गोल्डकप फुटबल प्रतियोगिताको सेमिफाइनल समिकण पुरा भएको छ ।
शनिवारबाट क्वार्टरफाइनल खेलहरु सकिएसँगै सेमिफाइनल समिकरण पुरा भएको हो । शनिवार भएको अन्तिम क्वार्टरफाइनलमा फ्रेन्ड्स क्लब ललितपुरलाई हराउँदै हिमालयन शेर्पा क्लब सेमिफाइनलमा प्रवेश गरेको छ ।
शनिवार भएको अन्तिम क्वार्टरफाइनल खेलमा फ्रेन्डसलाई २–१ गोल अन्तरले पराजित गर्दै हिमालयन शेर्पा अन्तिम चारमा स्थान बनाउँन सफल भएको हो । 
हिमालयनको जितमा अमृत श्रेष्ठ र कप्तान विश्वास श्रेष्ठले एक÷एक गोल गरे । यस्तै फ्रेन्डका तर्फबाट एन्जल महर्जनले एक गोल फर्काए । पहिलो हाफ बराबरीमा सकिएको खेलमा तिनवटै गोल दास्रो हाफमा संभव भएको थियो । 
हिमालयन शेर्पालाई जित दिलाउँन महत्वपूर्ण भुमिका खेलेका कप्तान विश्वास श्रेष्ठ शनिवारको खेलको ‘म्यान अफ दी म्याच’ भए । उनले नगद १० हजार सहित ट्रफी प्राप्त गरे । 
प्रतियोगिताको सेमिफाइनलमा हिमालयनसँगै यसअघिनै ‘ए’ डिभिजन क्लबहरु मनाङ मस्र्याङदी विभागीय टोली सशस्त्रको एपिएफ र विदेशी क्लब एभिनियर प्रवेश गरेका छन् । 
आइतबारबाट सुरु हुने सेमिफाइनलका पहिलो खेलमा ‘ए’ डिभिजन क्लब मनाङ मस्र्याङ्दी र विभागीय टोली सशस्त्रको एपिएफ क्लबबीच खेल हुने छ । यस्तै दोस्रो सेमिफाइनलमा सोमबार ‘ए’ डिभिजन क्लब हिमालयन शेर्पा र क्यामरुनी क्लब एभिनियर एकआपसमा भिड्ने छन् ।
फागुन १० गतेसम्म सञ्चालन हुने प्रतियोगिताको विजेताले नगद १५ लाख रुपैयाँ सहित ट्रफि र उपविजेताले नगद १० लाख रुपैया“ सहित ट्रफी प्राप्त गर्नेछन् ।