चाइना स्टेट कन्स्ट्रक्सनको भिमफेदी र बकैयामा निशुल्क स्वास्थ्य शिविर

१२ फागुन, हेटौंडा । काठमाडौं तराई द्रुतमार्ग निर्माणमा साझेदारी गरिरहेको चाइन स्टेट कन्स्ट्रक्सन इन्जिनियरिङ कार्पोरेशनको आयोजनामा भएको निशुल्क स्वास्थ्य शिविरबाट मकवानपुरको भिमफेदी र बकैयाँ गाउँपालिकाका २ सयभन्दा बढीले फाइदा लिएका छन् ।
मकवानपुरको भिमफेदी र बकैया गाउँपालिकास्थित द्रुतमार्ग क्षेत्र वरपरका सर्वसाधरणहरुका लागी चाइना स्टेट कन्स्ट्रक्सनले बिहीबार निशुल्क स्वास्थ्य परीक्षण तथा औषधि वितरण गरेको थियो ।
द्रुतमार्ग निर्माण कार्य अन्तगरत सुरुङमार्ग सहित केही पुलहरु निर्माणको जिम्मेवारी पाएको चाइना स्टेट कन्स्ट्रक्सनले चिनियाँ चिकित्सा सहायता अभियानको ६० औं बार्षिकोत्सवको अवसरमा स्वास्थ्य शिविरको आयोजना गरेको हो । 
मकवानपुरको भीमफेदी र बकैया गाउपालिकामा रहेका धेद्रे, कोलखोला, महादेवटार, चारघरे, आँपचौर गाउँ लगाएतका स्थानका स्थानीयहरुका लागि आयोजना गरिएको निशुल्क स्वास्थ्य शिविरमा करीब २ सय जनाले निशुल्क स्वास्थ्य सेवा लिएका छन् । 
स्वास्थ्य शिविरमा आएका अधिकांश स्थानीयमा उच्च रक्तचाप, डायविटिज, मृगौलामा खराबी तथा महिलाहरुमा छाति र स्तनको समस्या देखिएको शिविरका टिम लिडर डाक्टर च्याले जानकारी दिए । स्थानीयको स्वास्थ्य परीक्षणसँगै उनीहरुलाई निशुल्क औषधि समेत वितरण गरिएको थियो । 
औषधि उपचारको लागी हेटौंडा बजारसम्म पुग्नुपर्ने स्थानीयले गाउँमै निशुल्क स्वास्थ्य परीक्षण गराउँन पाउँदा खुशी लागेको बताए । उनीहरुले समय समयमा यस्तै संघसंस्था र सरकारले समेत गाउँघरमै स्वास्थ्य शिविरको सञ्चालन गरिदिए उपचारको लागी सदरमुकाम हेटौंडासम्म पुग्नुपर्ने बाध्यता हट्ने बताए ।
चाइन स्टेट कन्स्ट्रक्सन इन्जिनियरिङ कार्पोरेशनका मेटेरियल हेड लिऊले आफ्नो सामाजिक उत्तरदायित्व स्वरुप द्रुतमार्ग निर्माणस्थल वरपरका गाउँका करीब २ सय जनालाई निःशुल्क स्वास्थ्य परिक्षण र निःशुल्क औषधि वितरण गर्न पाउँदा खुशीलागेको बताए । 
उनले शिविरमा आउन नसक्ने शारीरिक रुपमा अशक्तलाई कर्पोरेशनले सवारी साधनको व्यवस्था गरेर शिविरसम्म ल्याएको जानकारी दिए । यस्तै स्वास्थ्य शिविरमा द्रुतमार्ग निर्माणमा खटिएका नेपाली सेनाले समेत स्वास्थ्य परिक्षण गराएको लिऊले बताए ।
शिविरमा चीनको परम्रागत औषधि उपचार विधि एक्युपन्चरबाट पनि उपचार गरिएको थियो । शिविरमा इसिजी, अल्ट्रासाउण्ड, गाईनोलोजी, इएनटी लगायतको स्वास्थ्य सेवा प्रदान गरिएको थियो । शिविर रहेको स्थान विकट स्थान भएकाले दुर्घटना भईहालेमा वा कसैलाई उद्धार गर्नु परेमा कसरी उद्धार गर्ने ? भन्ने समेत सिकाईएको थियो ।