हेटौँडा ६ चौघडामा लोकतान्त्रिकको घरदैलो 

९ मंसिर, हेटौँडा । लोकतान्त्रिक गठबन्धनको हेटाँैडा ६ चौघडाको विभिन्न स्थानमा शनिवार चुनाव प्रचारप्रसार तथा घर दैलो कार्यक्रम भएको छ । 
लोकतान्त्रिक गठबन्धनका तर्फबाट मकवापुर जिल्ला प्रतिनिधि सभा क्षेत्र नम्बर १ को प्रदेश सभा ख का उम्मेदवार अशोक शाक्यको नेतृत्वको टोलीले हेटौँडा उपमहानगरपालिका वडा नम्बर ६ का विभिन्न स्थानमा पुगेर मतदातासँग लोकतान्त्रिक गठबन्धनको पक्षमा मतदान गर्न आग्रह गरेको हो । 
घरदैलो कार्यक्रममा प्रदेश सभा ख का उम्मेदवार अशोक शाक्यले लोकतन्त्रको संस्थागत विकास र जनताको जिवनस्तर उकास्न लोकतान्त्रिक पक्षधरहरुलाई भोट दिन आग्रह गर्नुभयो । शाक्यले लोकतान्त्रिक पक्षधरले जिते मात्रै अहिलेको राजनितिक संकक्रमणले निकास पाउँने र देशले विकास पाउँने दावी गर्नुभयो । 
यस्तै राप्रपाबाट समानुपातिक उम्मेदवार दिपक सिंहले बाम गठबन्धनका नेताहरुले पटकपटक जिते पनि मकवापुरको विकासका लागि काम नगरेकाले अब लोकतान्त्रिकको जित अपरिहार्य रहेको बताउनुभयो । 
कार्यक्रममा केन्द्रीय सदस्य मधु अधिकारी, नेपाली कांग्रेसका तर्फबाट प्रतिनिधि सभाका समानुपातिक उम्मेदवार पवित्रा विक, राप्रपाका युवा नगर अध्यक्ष भृगु कार्की, राप्रपा क्षेत्रीय अध्यक्ष धुव्र संजेल, राप्रपाका नगर अध्यक्ष गुरुप्रसाद सापकोटा ६ नम्बर वडाका वडा अध्यक्ष अर्जुन चौलागाई, वडा सदस्य राजकुमार बास्तोला लगायतको उपस्थिति रहेको थियो ।