यौनिक तथा लैङ्गिक अल्पसंख्यक समाजका विकृति होइनन्ः मन्त्री मोक्तान

१९ फागुन, हेटौंडा । बागमती प्रदेशका सामाजिक विकास मन्त्री कुमारी मोक्तानले यौनिक तथा लैङ्गिक अल्पसङ्ख्यक समुदायको हक अधिकारको अभियानमा साथै रहने प्रतिबद्धता व्यक्त गरेकी छन् ।
बिहीबार यौनिक तथा लैङ्गिक अल्पसङ्ख्यक समुदायमा आधारित चलचित्र निलोफूलको विशेष प्रदर्शनीमा मन्त्री लामाले समलिङ्गी तेस्रोलिङ्गीहरु यो समाजको विकृति होइन भन्ने बुझाउनु आवश्यक रहेकोमा जोड दिइन् । 
उनले विपरित लिंङ्गीप्रतिको विवाहलाई मात्र नेपाली समाजले स्वीकार्दै आएको भन्दै उनले समाजमा समलिङ्गी तेस्रोलिङ्गीहरु पनि छन् र उनीहरुको अधिकार सुनिश्चित हुनुपर्छ भन्ने धारणाको विकास हुन जरुरी रहेको बताईन् । 
सामाजिक विकास मन्त्री मोक्तानले नीति निर्माणको ड्राफ्ट गर्न यही समुदायको अगुवालाई नै दिएको जानकारी दिदै सम्बन्धित क्षेत्रमा काम गर्दै आएका र पीडित भएकाहरुले नै निर्माण गरेको नीति वास्तविक हुने दावी गरिन् ।
उक्त अवसरमा यौनिक तथा लैङ्गिक अल्पसङ्ख्यक अगुवा एवम् निर्माता निर्देशक सुनिलबाबु पन्तले सरकारले यो समुदायप्रति अपनत्व ग्रहण नै नगरेको गुनासो गरेका थिए । समावेशीताको कुरा समलिङ्गी तेस्रोलिंगी समुदायमा कार्यान्वयन नभएको उनको गुनासो थियो ।