'हिंसा न्युनीकरण’ बक्तृत्वकलामा जानुका प्रथम

२२ फागुन, हेटौंडा । ११३ औं अन्तराष्ट्रिय महिला दिवसको अवसरमा हेटौंडामा आयोजित ‘हिंसा न्युनीकरणमा हाम्रो भूमिका’ विषयक बक्तृत्वकला प्रतियोगितामा हेटौंडा–१४ का जानुका दवाडी प्रथम भएकी छन् । 
वडास्तरीय महिला सञ्जालका बिच भएको प्रतियोगितामा हेटौंडा– ७ का कमला शर्मा द्धितिय, वडा नम्बर १२ की लक्ष्मी ढुङगेल तृतिय हुँदा हेटौंडा–४ की राधिका चौलागाईले सान्त्वना पुरस्कार प्राप्त गरेका छन् । 
अन्तराष्ट्रिय महिला दिवसको अवसरमा आयोजित प्रतियोगिताको उद्घाटन गर्दै हेटौंडा उपमहानगरपालिकाका प्रमुख मीनाकुमारी लामाले सचेतनाका कार्यक्रम गाउँगाउँ सम्म लैजान आवश्यक रहेको बताइन् । 
उनले ‘८ मार्च’ महिला हिंसा बिरुद्धको दिवसलाई सप्ताह व्यापी कार्यक्रमको रुपमा मनाउँन उपमहानगरले अग्रणी भूमिका निर्वाह गर्ने भन्दै अभियानलाई नगरका वडातहसम्म लैजान अधिकारकर्मिहरुलाई सुझाब दिइन् । 
नगर स्तरीय महिला जागरण समुहका अध्यक्ष तारा ढुङगानाको अध्यक्षतामा भएको कार्यक्रममा हेटौंडा उपमहानगरपालिकाका प्रमुख प्रशासकिय अधिकृत शिबराज चौलागाई, गैरसरकारी सस्था महासंघ बागमती प्रदेशका अध्यक्ष आरती पाठक लगाउतको उपस्थिति रहेको थियो । 
प्रतियोगितामा उपमहानगरपालिका महिला तथा वालबालिका महाशाखा प्रमुख बिष्णुकुमारी लामिछाने, शिक्षा शाखाका सुनिता महर्जन र माइती नेपाल मकवानपुरका कार्यक्रम संयोजक माया लामा बक्तृत्वकलामा निर्णायकको भूमिकामा रहेका थिए ।