भोलीबाट हेटौंडा ९ मा मोहन श्रेष्ठ स्मृति भेट्रान्स फुटबल हुने

२६ फागुन, हेटौंडा । भोली शनिबारबाट हेटौंडा ९ मा मोहन श्रेष्ठ स्मृति एट ए साइड भेट्रान्स रनिङ कप नकाउट फुटबल प्रतियोगिता सुरु हुँदैछ । 
हेटौंडा ९ मा रहेको पशुपति युवा क्लवले पूर्व खेलाडी श्रेष्ठको स्मृतिमा भेट्रान्स फुटबलको आयोजना गर्न लागेको हो । प्रतियोगिताको सम्पूर्ण तयारी पूरा भएको आयोजकले पत्रकार सम्मेलनमार्फत जानकारी दिएको छ ।प्रतियोगितामा हेटौंडा उपमहानगरको २, ४, ५, ६, ७, ८, ९, १०, १४, १५, १६, १७ र १८ नम्बर वडा गरी १३ वटा टिमको सहभागिता रहेको छ । उद्घाटन खेल ७ र १८ नम्बर वडाको बीचमा हुनेछ । 
हेटौंडा ८ स्थित औद्योगिक क्षेत्रको खेल मैदानमा हुने प्रतियोगितामा हेटौंडा उपमहानगरपालिका भित्रका वडाहरुले सहभागिता जनाउने आयोजकले नियम बनाएको छ । 
प्रतियोगिताको विजेताले एकलाख ५ हजार ५५५ तथा उपविजेताले ५५ हजार ५५५ रुपैयाँसहित ट्रफी प्राप्त गर्नेछन् । यस्तै विधागत उत्कृष्ट खेलाडी तथा प्रशिक्षकलाई जनही नगद ५ हजार ५५५ रुपैयाँ प्रदान गरिने आयोजकले जानकारी दिएको छ ।
पूर्व खेलाडीको योगदानलाई जीवन्त राख्दै खेलकुदको विकास एवम् भ्रातृत्वका लागि प्रतियोगिता आयोजना गरिएको आयोजक पशुपति युवा क्लवका अध्यक्ष राजकुमार श्रेष्ठले जानकारी दिए । 
क्लवका पूर्व कोषाध्यक्ष समेत रहेका मोहन श्रेष्ठको नाममा नियमित प्रतियोगिता गराउनका लागि कोष स्थापनाको तयारी समेत रहेको जानकारी दिइएको छ । प्रतियोगिताको उद्घाटन हेटौंडा उपमहानगरपालिकाका उपमेयर राजेश बानियाँले गर्नेछन् ।