कुटपिट र चक्कु प्रहारबाट दुईको मृत्यु, ५ जना पक्राउ

सांकेतिक तस्विर

२७ फागुन, रौतहट । रौतहटको राजदेव र मौलापुर नगरपालिकामा भएको कुटपिट र चक्कु प्रहारबाट दुई जनाको मृत्यु भएको छ । घटनामा संलग्न रहेको आरोपमा प्रहरीले ५ जनालाई नियन्त्रणमा लिएर अनुसन्धान थालेको जनाएको छ । 
राजदेवी नगरपालिका–१ पथरा टोलका २५ वर्षीय गजेन्द्र दासको कुटपिटबाट मृत्यु भएको प्रहरीले जनायो । त्यस्तै जिल्लाको मौलापुर नगरपालिकाको पथराबुधरामका ४१ वर्षीय नरेश महतोको चक्कु प्रहारबाट मृत्यु भएको छ । पथराबुधराम टोलमा यही बिहीबार दिउँसो मदिरा सेवन गरेर स्थानीय सञ्जय महतो र नरेशबीच विवाद भएको थियो । विवादबीच सञ्जयले नरेशमाथि चक्कु प्रहार गरेका थिए । चक्कु प्रहारबाट गम्भीर घाइते नरेशको स्थानीय स्वास्थ्य केन्द्रमा उपचार सम्भव नभएपछि थप उपचारका लागि वीरंगन्ज लैजाने क्रममा बाटोमै मृत्यु भएको जिल्ला प्रहरीले जनाएको छ । ढिलागरी सूचना प्राप्त भएको भन्दै प्रहरीले दुवै घटना अहिलेसम्म सार्वजनिक गरेको छैन ।
मौलापुर घटनामा संलग्न रहेको आरोपमा आरोपित सञ्जयसहित ५ जनालाई नियन्त्रणमा लिएर अनुसन्धान थालेको जिल्ला प्रहरी प्रमुख एसपी वीरबहादुर बुढामगरले बताए । ‘हामीलाई घटनाबारे पीडितले ढिला गरी जानकारी गराएकाले समस्या भएको हो,’ उनले भने, ‘राजदेवीको कुटपिटको घटनामा ढिला गरी सूचना दिएकाले कोही पक्राउ परेको छैनन् । हामी चाँडै संलग्नलाई पक्रेर कारबाही गर्छौं । मौलापुरको घटनामा केही मानिस पक्राउ परिसकेका छन् ।’ जिल्ला प्रहरीमा मौलापुर र राजदेवी घटनाका किटानी जाहेरी परिसकेको जनायो ।

राजदेवी घटनामा मृतक परिवारका अनुसार गएको बुधबार होलीको दिन स्थानीय गणेश यादव सहितका तीन जनाको समूहले गजेन्द्र दासलाई कुटपिट गरेका थिए । घटनापछि यादव सहितका समूह फरार छन् । कुटपिटबाट सख्त घाइते दासको यही बिहीबार साँझ मृत्यु भएको प्रहरीले जनायो । दासको घरमै मृत्यु भएपछि मात्र प्रहरीलाई खबर गरेका थिए । एसपी बुढा मगरका अनुसार दासको घरमै मृत्यु भएपछि मात्र प्रहरीकहाँ खबर आयो । त्यसपछि प्रहरी पुगेर अनुसन्धानको क्रममा सोधपुछ थालेको हो । (ईकान्तिपुरबाट)