मोहन श्रेष्ठ स्मृति भेट्रान्सको उपाधि ७ नम्बर वडाले जित्यो

२ चैत, हेटौंडा । हेटौंडा ९ मा रहेको पशुपति युवा क्लबको आयोजनामा सम्पन्न मोहन श्रेष्ठ स्मृति एट ए साइड भेट्रान्स फुटबल प्रतियोगिताको उपाधि हेटौंडाको ७ नम्बर वडाले जितेको छ ।
क्लवका पूर्व कोषाध्यक्ष एवम् पूर्व खेलाडी श्रेष्ठको स्मृतिमा आयोजना गरिएको प्रथम भेट्रान्स फुटबलमा हेटौंडाको ४ नम्बर वडालाई टाइब्रेकरमा १–० गोल अन्तरले हराउँदै ७ नम्बरले उपाधि जितेको हो । 
विजेता ७ नम्बर वडाले एकलाख ५ हजार ५५५ रुपैयाँ सहित शिल्ड प्राप्त गरेको छ भने उपविजेता बनेको ४ नम्बरले ५५ हजार ५५५ रुपैयाँ पुरस्कार पाएको छ । 
बुधबार भएको फाइनल खेलको निर्धारित समय गोलरहित बराबरी भएपछि खेल टाइब्रेकरमा पुगेको थियो । टाइब्रेकरमा ७ नम्बरका तर्फबाट एक मात्र गोल अमर गुरुङले गर्दा भरत तितुङको प्रहार बाहिरिएको थियो । यस्तै पराजित टोलीको तर्फबाट रणबीर थापा, ओम गुरुङ र मनोज लामाको प्रहार खेर गएको थियो । 
प्रतियोगिताका विजेता, उपविजेता तथा विधागत उत्कृष्ट खेलाडीहरुलाई हेटौंडा उपमहानगरपालिकाका उपमेयर राजेश बानियाँ, हेटौंडा उपमहानगरपालिका ९ नम्बर वडा अध्यक्ष सुकराम केसी, आयोजक पशुपति युवा क्लवका अध्यक्ष राजकुमार श्रेष्ठ लगायतले पुरस्कार वितरण गरेका हुन् ।