बैशाख १ गते तरूण दलले चौघडामा दौड प्रतियोगिता गर्ने

२० चैत, हेटौंडा । नेपाल तरुण दल हेटौंडा ६ नम्बर वडा इकाई समितिले नयाँ वर्ष २०८० को अवसरमा बैशाख १ गते शुभकामना दौड प्रतियोगिता गर्ने भएको छ । नयाँ वर्षको शुभकामना आदानप्रदानसंगै ५ किलोमिटर दौड प्रतियोगिताको आयोजना गर्न लागिएको हो ।
शुभकामना दौडका लागि मकवानपुर जिल्ला स्थायी ठेगाना भएको हुनुपर्ने नेपाल तरुण दल हेटौंडा ६ नम्बर वडाका अध्यक्ष कमल कोइरालाले जानकारी दिए । दौड प्रतियोगिताको लागि विभिन्न उपसमितिहरु समेत गठन गरिएको छ । आर्थिक समितिको संयोजकमा भूपेन्द्र विष्ट, प्रचारप्रसार समितिमा विजय पौडेल, स्वागत तथा सम्मान समितिमा राजकुमार बास्तोला, स्वयंसेवक परिचालन समितिमा ईश्वर राना र सचिवालय समिति तरुण दल ६ नम्बर वडाका सचिव विजय चौलागाई रहेका छन् । 
प्रतियोगितामा सहभागिताका लागि हेटौंडा ४ स्कुलरोडमा रहेको पाण्डे इन्टरप्राइजेज, नेपाली कांग्रेस जिल्ला पार्टी कार्यालय, नेपाली कांग्रेस ६ नम्बर वडा इकाई समितिको सचिवालयमा र हेटौंडा २ कांग्रेसचोकमा रहेको बेङ्कटेश छापाखानामा दौड प्रतियोगितामा सहभागिता जनाउन इच्छुकले फारम भर्ने व्यवस्था रहेको छ । प्रतियागिताको प्रथम हुनेले नगद १५ हजार रुपैयाँ, दोस्रो हुनेले १० हजार रुपैयाँ र तेस्रो हुनेले नगद ५ हजार रुपैयाँ प्राप्त गर्नेछन् । नेपाल तरुण दल ६ नम्बर वडा इकाई समितिले आयोजना गरेको शुभकामना दौडकोे यो ८ औँ संस्करण हो ।