अधिनायकवादी सत्ता ल्याउने कम्युनिष्टहरुको सपना पुरा हुन्न : देउवा

१४ मंसिर, हेटौँडा । प्रधानमन्त्री एवं नेपाली कांग्रेसका सभापति शेरबहादुर देउवाले नेपालमा अधिनायकवादी सत्ता ल्याउने कम्युनिष्टहरुको सपना पुरा नहुने दावि गरेका छन् । उत्तरी मकवानपुरका पालुङमा संयुक्त लोकतान्त्रिक गठबन्धनको चुनावी सभामा बोल्दै प्रधानमन्त्री देउवाले बाम गठबन्धनको नाममा कम्युनिष्टहरुले अधिनायकवादी एकतन्त्रीय शासन लागु गर्न खोजेको भन्दै उनीहरुको सपना जनताले पुरा हुन नदिने बताए । उनले नेपाली कांग्रेस २००७ सालदेखि हरेक खालका तानाशाही प्रवृत्ति विरुद्ध नेतृत्व गरेको भन्दै अहिले बाम गठबन्धनले ल्याउन खोजेको अधिनायकवादी व्यवस्थालाई जनताको साथबाट परास्त गर्ने बताए । उनले अहिलेको संविधान समावेशी संविधान भएको भन्दै बाम गठबन्धनले जिते संविधान उल्टाउने समेत जिकिर गरे ।
कार्यक्रममा बोल्दै उपप्रधानमन्त्री एवं राप्रपा अध्यक्ष कमल थापाले अहिलेको अधिनायकवाद विरुद्ध लोकतान्त्रिक गठबन्धन बनेको भन्दै देश विकासका लागि यो गठबन्धनको जित आवश्यक रहेको बताए । उनले लोकतान्त्रिक गठबन्धनले आगामी ५ बर्षभित्रमा नेपालको गरिवी, शोषण र विभेद अन्त्यका लागि काम गर्ने समेत दावि गरे ।
कार्यक्रममा नेपाली कांग्रेस केन्द्रीय निर्वाचन परिचालन समिति संयोजक बालकृष्ण खाँड, मकवानपुर प्रतिनिधिसभा क्षेत्र नम्बर १ का उम्मेदवार महालक्ष्मी डिना उपाध्याय, प्रदेश २ का उम्मेदवार पूर्व गृहराज्यमन्त्री ईन्द्रबहादुर बानियाँ, प्रदेश १ का उम्मेदवार यतिराज सापकोटा, उद्योगपति विनोद चौधरी लगायतले समग्र देशको विकासका लागि लोकतान्त्रिक गठबन्धनको पक्षमा मतदाताहरु आकर्षित भईरहेको बताएका थिए । कार्यक्रमस्थल वरपर नेपाली सेना, नेपाल प्रहरी र सशस्त्र प्रहरीको कडा सुरक्षा रहेको थियो ।