हेटौंडा १८ का १८६ धारा खानेपानी बोर्डमा हस्तान्तरण

२८ चैत, हेटौंडा । हेटौंडा उपमहानगरपालिका भित्र उपभोक्ता समिति मार्फत सञ्चालनमा रहेका खोनेपानीका धाराहरु हेटौंडा खानेपानी व्यवस्थापन बोर्डमा हस्तान्तरण हुने क्रम बढेको छ । 
उपमहानगरपालिकामा पछि थपिएका तथा साविकका वडाहरुमा उपभोक्ता समिति मार्फत सञ्चालनमा रहेका धाराहरु बोर्डको सेवा चुस्तदुरुस्त भएपछि धमाधम बोडमा हस्तान्तरण हुन थालेका हुन् । 
यसैबीच मंगलबार हेटौंडा–१८, हर्नामाडीस्थित ठूलोदमारका १८६ वटा धारा बोर्ड मातहतमा हस्तान्तरण भएका छन् । हर्नामाडी डीप बोरिङ खानेपानी तथा सरसफाइ उपभोक्ता समितिअन्तर्गत् रहेका १८६ वटा धारा बोर्ड मातहत हस्तान्तरण भएको बोर्डका सूचना अधिकारी सञ्जय न्यौपानेले जानकारी दिए । 
एक कार्यक्रमकाबीच उपभोक्ता समिति अध्यक्ष रामकृष्ण बानिया“ले बोर्ड अध्यक्ष प्रताप विष्टलाई सम्पूर्ण कागजात हस्तान्तरण गरेका हुन् । बोर्ड मातहत आएस“गै स्थानीयले न्यूनतम पानी महसुलमा छुट प्राप्त गर्नुका साथै धारा जडान शुल्कमा सहुलियत प्राप्त गर्नेछन् । हाल उपभोक्ता समितिमार्फत् धारा जडान गर्दा दशहजार रुपैयाँ तिर्दै आएका उपभोक्ताले अब ३८ सय ५० रुपैयाँ तिरे पुग्छ । 
‘अब उपमहानगरपालिकाले तोके अनुसारको न्यूनतम महसुल यसै महिनाबाट छुट गर्ने व्यवस्था मिलाउने छौं ।’, बोर्ड अध्यक्ष विष्टले मासिक दशहजार लिटरसम्म पानी नगरका उपभोक्तानले निःशुल्क प्राप्त गर्ने जानकारी दिए । उनले नगरभर रहेका उपभोक्ता समितिलाई विस्तारै बोर्डअन्तर्गत् ल्याउन छलफल भइरहेको पनि बताए । 
बोर्डका सूचना अधिकारी न्यौपानेका अनुसार चालु आर्थिक वर्षमा हेटौंडा–१०, न्यूरेनीमा रहेको उपभोक्ता समितिको १५० वटा धारा, हेटौंडा–१४, बनेलधापमा रहेको २ लाख ५० हजार लिटर क्षमताको पानी ट्यांकी समेत बोर्ड मातहत आइसकेको छ ।  
यस्तै सूचना अधिकारी न्यौपानेले हेटौंडा–१३, पदमपोखरीस्थित ठूलोथली खानेपानी तथा उपभोक्ता समिति अन्गर्ततका एक हजारभन्दा बढी धारा बोर्ड मातहत चालु आर्थिक वर्षमै हस्तान्तरण हुने क्रममा रहेको जानकारी दिए । य
सैगरी हेटौंडा–१८, हर्नामाडीमा रहेको सहलगानी, भौडी खानेपानी र बुदुने, हेटौंडा–३, बसामाडीको मिलन टोल तथा हेटौंडा–६, कल्याणीटारस्थित खानेपानी उपभोक्ता समिति पनि बोर्ड मातहत आउने तयारी भइरहेको न्यौपानेले बताए । बोर्डले उपमहानगरपालिका भित्र हाल २३ हजार २७० धारामार्फत दैनिक १ करोड ८५ लाख लिटर पानी बोर्डले वितरण गर्दै आएको जनाएको छ ।