थाहामा सम्पन्न खुल्ला दौडमा पुरुषतर्फ विकास र महिलतर्फ  सुष्मा प्रथम

३० चैत, थाहा नगर । थाहा नगर खेलकुद विकास समितिको आयोजनामा बिहीबार भएको खुल्ला दौड प्रतियोगितामा पुरुषतर्फ विकास लो र महिला तर्फ सुष्मा घलान विजयी भएका छन् । 
‘स्वस्थ्य मुटुको लागि दौड’ भन्ने नाराका साथ भएको थाहा नगरपालिका स्तरिय खुल्ला महिला तथा पुरुष दौड प्रतियोगितामा पुरुषतर्फ थाहा नगरपालिका ११ का लो प्रथम भएका हुन् । उनले निर्धारित ५ किलोमिटरको दुरी २० मिनेट ५५ सेकेण्डमा पुरा गरेका थिए ।
यस्तै महिलातर्फ ३ किलोमिटर निर्धारित दुरी १४ मिनेट ४४ सेकेन्डमा पुरा गर्दै थाहा १२ कि सुश्मा घलान प्रथम भईन् । प्रथम भएका महिला र पुरुष खेलाडीले जनही १२ हजार नगद सहित शिल्ड र मेडल प्राप्त गरेका छन् ।
यस्तै पुरुषतर्फ निखिल बर्तौलाले निर्धारित दुरी २१ मिनेट १५ सेकेन्डमा पूरा गर्दै दोश्रो भएभने २१ मिनेट ३८ सेकेन्डमा निर्धारित दुरी पार गर्दै लवशेर घिसिङ तेश्रो भए । यसैगरी महिलातर्फ निर्धारित दुरी १५ मिनेट २१ सेकेन्डमा पूरा गर्दै सन्ध्या गोले दोश्रो र १५ मिनेट ३६ सेकेन्डमा दुरी पार गर्दै आशा तामाङ तेश्रो भईन् ।
प्रतियोगितामा दोश्रो र तेस्रो हुनेले क्रमशः ८ हजार र ५ हजार नगद सहित शिल्ड मेडल र प्रमाणपत्र प्राप्त गरेका छन्  । प्रतियोगितामा पुरुषतर्फ २१ जना महिलातर्फ ११ जना खेलाडीले सहभागीता जनाएका थिए ।
विजयी खेलाडिहरुलाई थाहा नगरपालिकाका उपप्रमुख भरत गोपाली, थाहा नगर खेलकुद विकास समितिका संयोजक टिकाराम स्याङ्तानले पुरस्कार प्रदान गरेका थिए । कार्यक्रममा वडा न १ का अध्यक्ष हेरमान गोपाली, वडा नम्बर ३ का अध्यक्ष हिरेन्द्र रायमाझी, वडा नम्बर ४ का अध्इक्ष नारायण लामा, खेलकुद विकास समितिका सदस्य सचीव अनिल लामिछाने, फरक सोचका संयोजक यादवजंग रायमाझी, ल्याम्ह पुचः मकवानपुरका अध्यक्ष सुविन्द्रमान प्रधान लगायतको उपस्थिति रहेको थियो ।