दुईदिने हेटौंडा साहित्य महोत्सव सुरु

९ बैशाख, हेटौंडा । शुक्रबारबाट हेटौंडामा दुईदिने ‘हेटौंडा साहित्य महोत्सव’ सुरु भएको छ । मकवानपुरको अग्रणी साहित्यिक संस्था साहित्य संगम मकवानपुरको आयोजना तथा हेटौंडा उपमहानगरपालिका र नेपाल प्रज्ञा प्रतिष्ठानसँगको सहकार्यमा साहित्य महोत्सव सुरु भएको हो । 
दुईदिनसम्म सञ्चालन हुने महोत्सवको हेटौंडा उपमहानगरपालिकाकी प्रमुख मिना लामाले उद्घाटन गरिन् । कार्यक्रमकी प्रमुख अतिथि लामाले प्रदेशको राजधानी हेटौंडामा सुरु भएको साहित्यिक गतिविधिको साक्षि बस्न पाउँदा आफुलाई खुसी लागेको भएको बताईन । साहित्यीक गतिविधिले कुनैपनि मुलुकको भाषा र संस्कृतिलाई जोगाउँन महत्वपूर्ण भूमिका खेल्ने उनको भनाई थियो ।
महोत्सवमा साहित्यका विभिन्न पक्षमा वहस, कविता वाचन, गजल महफिल, मुक्तक वाचन, कृति विमोचन, पुस्तक प्रदर्शनी, चित्रकला प्रर्दशनी, आदिवासी जनजातिका कथा लगायतका विषय रहने आयोजक संगमका अध्यक्ष अनिता न्यौपानले जानकारी दिइन् । मकवानपुरे साहित्यमा २०४४ सालदेखि क्रियाशिल संगमले पहिलो पटक साहित्यिक महोत्सवको आयोजना गर्न लागेको हो । 
यसैगरी महोत्सवकै अवसरमा पारेर बैशाख ९ गते शनिवार साहित्य संगम मकवानपुरको ३३० औं नियमित साहित्य सन्ध्यामा संगमले प्रदान गर्ने विभिन्न ११ वटा पुरस्कार तथा सम्मान समेत समर्पण गरिने संगमका सचिव डिबी बर्तौलाले जानकारी दिए ।