एसिसी प्रिमियर कपमा नेपालद्वारा कतार पराजित

फाइल तस्बिर

१४ बैशाख, काठमाडौं । एसिसी प्रिमियर कपअन्तर्गत समूह ‘ए’को अन्तिम खेलमा नेपालले कतार पराजित गरेको छ ।
बिहीबार टियु मैदान कीर्तिपुरमा भएको खेलमा कतारलाई ६८ रनले पराजित गरेको नेपालले समूह विजेता बन्दै सेमिफाइनलमा स्थान बनाएको छ ।
पहिले ब्याटिङ गर्दै नेपालले दिएको १ सय ५८ रनको लक्ष्य पछ्याएको कतार २५.१ ओभरमा ८९ रनमा समेटिएपछि नेपालले फराकिलो जित निकाल्यो । नेपालका लागि सन्दीप लामिछानेले ५ विकेट लिँदा सोमपाल कामीले ३ तथा ललित राजवंशीले २ विकेट लिए। कतारका लागि जाहिर इब्राहिम र खुराम सहाजादले १५/१५ रन र अमिर फारुकले १४ रन बनाए ।
त्यसअघि पहिले ब्याटिङ गरेको नेपालले ४०.३ ओभरमा अलआउट हुँदै १५७ रन बनाएको थियो। टस हारेर पहिले ब्याटिङ गरेको नेपाल सुरुवातबाटै खराब प्रदर्शन गर्यो । नेपालका लागि कुनै पनि खेलाडीले गतिलो इनिङ खेल्न सकेनन्।
यद्यपि दशौं विकेटका लागि सन्दीप लामिछाने र ललित राजवंशीले ४६ रनको साझेदारी गरेका थिए। राजवंशी १७ बल खेलेर १ रन जोड्दै अमिर फारुकको बलमा एल्बिडब्लु आउट भएसँगै नेपाली इनिङ सस्तैमा समेटिएको हो। नेपालका लागि सन्दीप लामिछानेले ५८ बलमा ६ चौकाको सहयोगमा ४२ रन बनाउनु सर्वाधिक रह्यो। सन्दीपको यो एकदिवसीय क्रिकेटमा सर्वाधिक रनसमेत हो ।
त्यसअघि नेपालका कप्तान रोहित पौडेलकले २७ रन बनाउँदा आसिफ शेखले १९ रन बनाएका थिए। त्यस्तै, दिपेन्द्र सिंह ऐरीले १२ रन बनाए। आरिफ शेख र सोमपाल कामीले समान ११ रन बनाएका थिए। नेपालका लागि भीम सार्की ६ रनमा आउट हुँदा कुशल मल्ल ३ तथा कुशल भुर्तेल २ रनमा आउट भए। त्यस्तै, गुल्सन झा ७ रनमा आउट भएका थिए । कतारका लागि ओवासी अह्मेदले ३ विकेट लिँदा अमिर फरुकले ४ विकेट हात पारे। त्यस्तै, ग्यान मनावेराले २ विकेट लिँदा इक्रमुल्लाह खानले १ विकेट लिएका थिए।
नेपाल ४ खेलमा ३ जित र एक खेलमा अंक बाँड्दै ७ अंकका साथ शीर्ष स्थानमा उक्लिएको छ । कतार भने प्रतियोगिताबाछ बाहिरियो ।