एसीसी प्रिमियर कप क्रिकेटमा नेपाल र युएई फाइनल प्रवेश

१६ बैशाख, काठमाडौं । काठमाडौंमा भएको एसीसी प्रिमियर कप क्रिकेटमा नेपाल र युएई फाइनल प्रवेश गरेका छन् । सेमिफाइनल खेल बर्षाले प्रभावित भएपछि नेपाल र युएई फाईनल प्रवेश गरेका हुन् । 
वर्षाले खेल प्रभावित भएपछि नेपाल समूह बिजेता भई सेमिफाइनल प्रवेश गरेका आधारमा सोझै फाइनलमा पुगेको छ । त्रिवि मैदानमा नेपाल र कुवेतबीचको खेल वर्षाका कारण प्रभावित भयो । वर्षाका कारण ओभर घटाइएको खेलमा नेपालले डक वर्थ लुईसका आधारमा २८१ रनको लक्ष्य दिएको थियो । जवाफी ब्याटिङ गरेको कुवेतले ८.३ ओभरमा ६ विकेट गुमाएर ३७ रन जोड्दा खेल वर्षाका कारण पुन: रोकिएको थियो ।
कुवेतले २० ओभरसम्म नखेलेका कारण डीएल प्रणालीबाट नतिजा दिन नमिल्ने भएका कारण समूह विजेता भएर सेमिफाइनल प्रवेश गरेका आधारमा फाइनलमा पुगेको छ ।
उता मुलपानी क्रिकेट मैदान भएको खेलमा युएईले भने डक वर्थ लुईसका आधारमा ओमानलाई २ रनले पराजित गर्यो । युएईले दिएको २३७ रनको लक्ष्य पछ्याएको ओमानले  ४३ ओभरमा ६ विकेट गुमाएर १९० रन बनाउँदा वर्षाका कारण खेल स्थगित भएको थियो ।
कुवेत र ओमानले तेस्रो स्थानका लागि आइतबार खेल्नेछन् भने फाइनल खेल नेपाल र युएईबीच सोमबार हुनेछ ।