एसीसी प्रिमियर कप क्रिकेटको उपाधि नेपाललाई

१९ बैशाख, काठमाडौं । एसीसी प्रिमियर कप क्रिकेट प्रतियोगिताको उपाधि नेपालले जितेको छ । कीर्तिपुरस्थित अन्तर्राष्ट्रिय क्रिकेट मैदानमा मंगलबार सम्पन्न फाइनल खेलमा यूएईलाई ७ विकेटको फराकिलो अन्तरले हराउँदै नेपालले उपाधि चुमेको हो । 
जितसँगै नेपालले यसै वर्ष पाकिस्तानमा आयोजना हुने एसिया कप क्रिकेट प्रतियोगितामा पनि स्थान पक्का गरेको छ । 
फाइनल खेलमा नेपालले जितका लागि १ सय १८ रनको लक्ष्य पाएको थियो । उक्त लक्ष्य नेपालले ३३.१ ओभरमा ३ विकेट गुमाउँदै पुरा गरेको थियो । नेपालको जितमा गुल्सन झा र भिम सार्कीले चौंथ विकेटका लागि ९६ रनको अविजित साझेदारी गरे।
गुल्सन झाले ८४ बलमा ६७ रन बनाएर अविजित रहँदा ३ चौका र ६ छक्का प्रहार गरेका थिउ। त्यस्तै भिम सार्कीले ७२ बलमा ३६ रन बनाए। उनले ४ चौका प्रहार गरेका थिए। त्यसअघि नेपालले २२ रन जोड्दा तीन विकेट गुमाएको थियो। युएईका लागि रोहन मुस्ताफाले २ विकेट लिंदा आयान खानले १ विकेट लिएका थिए।
वर्षाका कारण सोमबार पुरा हुन नसकेको फाइनलको बाँकी खेल मंगलबार सम्पनन् भएको हो । युएईले २७.३ ओभरमा ९ विकेट गुमाएर १०६ रनबाट खेल सुरु गर्दै ३३.१ ओभरमा १ सय १७ रन बनाउँदा अलआउट भएको थियो। ललित राजवंशीलेनै नेपालका लागि अन्तिम विकेट लिएका थिए।
युएईका लागि आसिफ खानबाहेक कुनै पनि ब्याटर क्रिजमा जम्न नसक्दा कमजोर अवस्थामा समेटिन पुग्यो । उसका लागि आसिफ खानले ४६ रन बनाउनु सर्वाधिक रह्यो। त्यस्तै, कप्तान मुहम्मद वासिमले ११ रन बनाउँदा आर्यान लाक्राले १३ रन बनाए। नेपालका लागि ललित राजवंशीले ४ विकेट लिँदा करण केसी र सन्दीप लामिछानेले समान २-२ विकेट हात पारे। त्यस्तै, सोमपाल कामी र गुल्सन झाले समान १-१ विकेट लिएका छन्।
प्रतियोगितामा नेपाल समूह ए को विजेता हुँदै फाइनलमा स्थान पक्का गरेको थियो । कुवेतसँगको सेमिफाइनल खेल वर्षाको कारण नतिजा विहीन बनेपछि नेपाल समूह विजेताको रुपमा फाइनलमा पुगेको थियो भने युएईले सेमिफाइनलमा ओमानलाई डिएल म्याथोडमा दुई रनले हराउँदै फाइनलमा स्थान बनाएको थियो ।