आवस्यकता अनुसार कानुन परिमार्जन नहुँदा समस्याः मन्त्री श्रेष्ठ

२१ बैशाख, हेटौंडा । बागमती प्रदेशका आन्तरिक मामिला मन्त्री गंगानारायण श्रेष्ठले आवश्यकता अनुसार कानून बनाउन र समयानुकुल परिमार्जन गर्न नसक्दा काम गर्न समस्या भएको बताएका छन् । 
विश्व प्रेस स्वतन्त्रता दिवसको सन्दर्भमा बुधबार हेटौंडामा भएको सञ्चारकर्मीहरुसँगको अन्तरक्रिया कार्यक्रममा उनले पञ्चायतकालीन ऐन कानूनमा काम गर्नुपर्ने बाध्यतात्मक अवस्था रहेको बताएका हुन् । 
‘अहिले पनि हामी पञ्चायतकालमा बनेको कानून अनुसार काम गर्न बाध्य छौं । आवश्यकता अनुसार बनाउन र समयानुकुल परिवर्तन गर्न सकिरहेका छैनौं’, मन्त्री श्रेष्ठले भने, ‘सञ्चार क्षेत्रलाई थप व्यवस्थित बनाउँदै यस क्षेत्रमा रहेका समस्या समाधानका लागि हामी तत्पर छौं ।’ बागमती प्रदेशमा सञ्चार क्षेत्रमा बजेट अपुग रहेको स्वीकार्दै उनले आगामी वर्षदेखि बढाउने आश्वासन दिए । 
बागमती प्रदेशका सञ्चार संस्थालाई व्यवस्थित बनाउँदै समस्या समाधानका लागि नेपालमै पहिलो पटक प्रदेशस्तरीय सञ्चार रजिष्ट्रारको कार्यालय निर्माण गराउँदै मन्त्री श्रेष्टले श्रजिवी पत्रकारले अझै पनि न्यूनतम पारिश्रमिक नपाउनु भने दुःखद् भएको बताए । 
कार्यक्रममा प्रदेशका सञ्चार रजिष्ट्रार रेवतीप्रसाद सापकोटाले मिडिया मर्जलाई प्रोत्साहन हुने गरी कार्यक्रम ल्याउने तयारीमा रहेको जानकारी दिए । गैरपत्रकारलाई प्रेस पास नदिने दावी गर्दै उनले पास वितरण प्रक्रियालाई थप व्यवस्थित बनाउने उनले बताए । 
यसअघि कार्यक्रममा सहभागी पत्रकारहरुले संघीयतापछि पत्रकारिता क्षेत्र थप कमजोर बनेको, गैरपत्रकारले सञ्चार रजिष्ट्रार कार्यालयबाट प्रेस पास लिने गरेको, जिल्ला तहका सञ्चार माध्यमलाई जगेर्ना गर्ने नीति नभएको, पहुँचको आधारमा कार्यक्रम तथा विज्ञापन वितरण गर्ने गरिएको लगायतका विषय उठान गरेका थिए ।