पाँचसय केजी गाँजा र नगदससहित कैलाशका दुई जना पक्राउ

२१ बैशाख, हेटौंडा । मकवानपुर प्रहरीले जिल्लाको कैलाश गाउँपालिका ४, कटुन्जेबाट लागुऔषध गाँजा र नगदसहित मंगलबार दुई जनालाई पक्राउ गरेको छ । 
विशेष सूचनाको आधारमा जिल्ला प्रहरी कार्यलय मकवनपुरबाट प्रहरी निरीक्षक दीपक केसीको कमाण्डमा खटिएको टोलीले स्थानीय ४२ वर्षीय राधाकृष्ण रिजाल र ३८ वर्षीय उत्तम रिजालको घरबाट लागुऔषध गाँजा बरामद गरेको हो । 
जिल्ला प्रहरी कार्यलय मकवानपुरका प्रवक्ता प्रहरी नायब उपरीक्षक टेकबहादुर कार्कीले प्रहरीले उनीहरुको घरबाट ५ सय १२ केजी लागूऔषध गाँजा र नगद ५५ हजार ३ सय ६५ रुपैयाँ बरामद गरेको जानकारी दिए । 
प्रवक्ता कार्कीका अनुसार प्रहरीले राधाकृष्ण रिजालको घरबाट १२ वटा बोरामा ३ सय २७ केजी ८०० ग्राम लागूऔषध गाँजा र उत्तम रिजालको घरबाट ६ वटा बोरामा १ सय ८४ केजी १०० ग्राम लागुऔषध गाँजा र नगद ५५ हजार ३ सय ६५ रुपैयाँ बरामद गरेको हो । 
लागुऔषध गाँजा र नगदसहित पक्राउ परेका दुवै जनामाथी आवस्यक कानुनी कार्वाही र अनुसन्धान थालिएको प्रवक्ता कार्कीले बताए । 
यसअघि सोमबार मात्रै मकवानपुर प्रहरीले जिललाको उत्तरी क्षेत्र थाहा नगरपालिका ७ का वडा अध्यक्ष सहित तीनजनालाई लागूऔषध गाँजासहित पक्राउ गरेको थियो ।