प्रहरीद्वारा गाँजासहित ४ जनालाई पक्राउ

२३ बैशाख, जनकपुर । प्रहरीले महोत्तरी र धनुषाबाट २ सय किलोभन्दा बढी गाँजासहित ४ जनालाई पक्राउ गरेको छ ।
पक्राउ पर्नेमा सर्लाहीको हरिवन नगरपालिका ३ का ३१ वर्षीय फेकन साह, २१ वर्षीय सन्तोष दास, धनुषाको मुखियापट्टी मुसहरनिया गाउँपालिका १ का २६ वर्षीय अमित कुमार यादव र २२ वर्षीय रविनकुमार यादव रहेका छन् ।
महोत्तरीको बर्दिबास नगरपालिका-४ स्थित पूर्वपश्चिम राजमार्गमा सवारी चेकजाँच गर्ने क्रममा प्र २-०२-००१ च ०४५७ नम्बरको स्कार्पियो जाँच गर्न खोज्दा चालक फरार भएको र ५ वटा सेतो प्लाष्टिकको बोराभित्र २ सय ७ किलो गाँजा बरामद भएको जिल्ला प्रहरी कार्यालय महोत्तरीका प्रहरी नायब उपरीक्षक दिलीपकुमार गिरीले जानकारी दिए।
यस्तै, धनुषाको मिथिला नगरपालिका १० लालगढस्थित बौवा होटलअगाडि पूर्व–पश्चिम राजमार्गमा इलाका प्रहरी कार्यालय ढल्केवर र लागूऔषध ब्यूरो जनकपुरधामबाट खटिएको प्रहरीको संयुक्त टोलीले १० किलो ५ सय ग्राम गाँजासहित ४ जनालाई पक्राउ गरेको छ ।
प्र २-०३-००७ प ८५४१ र ज ४ प ७७३३ नम्बरको मोटरसाइकल जाँच गर्दा गाँजा बरामद भएपछि फेकन, सन्तोष, अमित र रविनलाई पक्राउ गरेको धनुषाका प्रहरी नायब उपरीक्षक वेदप्रसाद गौतमले जानकारी दिए ।