काँग्रेसमा युवा र नयाँलाई अवसर एमालेमा पुरानै हावी

 १८ मंसिर, हेटौँडा ।आसन्न प्रतिनिधि तथा प्रदेश सभा सदस्य निर्वाचनमा मकवानपुरमा युवा र नयाँ अनुहारका उम्मेदवारहरुको बाहुल्य रहेको छ ।प्रतिनिधि सभा दुई र प्रदेशसभामा चार क्षेत्र रहेको मकवानपुरमा दलहरुले अधिकांश नयाँ र युवालाई उम्मेदवार वनाएका छन् ।
तर ठूला दलमा नयाँ र युवा उम्मेदवारमा अवसर पाउनेमा नेपाली काँग्रेसका बढी रहेका छन् । नेकपा एमालेमा पूराना अनुहारको हावी रहेको छ ।
उता बाम गठबन्धनबाट प्रदेशसभामा चार स्थान मध्ये एक स्थानमा मात्र नयाँ अनुहार छन् । 

लोकतान्त्रिक गठबनधनबाट नेपाली काँग्रेसले चार प्रदेशसभा मध्ये तीनवटा क्षेत्रमा युवा र नयाँ अनुहारलाई अवसर दिएको छ । काँग्रेसको तर्फबाट प्रतिनिधि सभा क्षेत्र नम्बर १ को प्रदेशसभा ‘क’ बाट धर्मराज लामिछाने, प्रतिनिधि सभा क्षेत्र नम्बर १ को प्रदेशसभा ‘ख’ बाट अशोक शाक्य र प्रतिनिधि सभा क्षेत्र नम्बर २ को प्रदेशसभा ‘क’ बाट यतिराज सापकोटा चुनावी प्रतिस्पर्धामा हुनुहुन्छ ।
बाम गठबन्धनबाट उम्मेदवारी पाउने नयाँ अनुहारमा प्रतिनिधि सभा क्षेत्र नम्बर १ को प्रदेशसभा ‘ख’ बाट डोरमणि पौडेलमात्र हुनुहुन्छ ।
यस्तै नयाँ शक्ति पार्टीकातर्फबाट प्रतिनिधि सभा क्षेत्र नम्बर २ को सदस्यमा सोनामसिं स्याङ्तान, राष्ट्रिय जनमोर्चामा रामहरि धितालसहित नेमकिपा, मंगोल नेशनल अर्गनाइजेशन, विवेकशील साझा पार्टीका, राष्ट्रिय जनमुक्ति मोर्चा, नेकपा माले, संघीय समाजवादी फोरम नेपाल, नेपाल संघीय पार्टी, एकीकृत राप्रपा (राष्ट्रवादी), राष्ट्रिय जनता पार्टी र चुरेभावर लोकतान्त्रिक पार्टीबाट नयाँ उम्मेदवारहरुले अवसर पाउनु भएको छ ।  आठ महिला चुनावी प्रतिस्पर्धामा रहेकोमा ६ जना नयाँ उम्मेदवार रहनु भएको छ ।