मकवानपुरमा आचारसंहिता विपरित गर्ने कर्मचारी कारवाहीमा

प्रदिप सापकोटाले आफनो फेसबुक पेजमा लेखेको विवादित स्ट्याटस

२० मंसिर, हेटौँडा । भोली विहिबार हुने दोश्रो चरणको प्रतिनिधि सभा र प्रदेश सभा निर्वाचन सम्पन्न गर्न खटिएका एकजना सरकारी कर्मचारीले आचार संहिता विपरित कृयाकलाप गरेपछि कार्वाहीमा परेका छन् ।

थाहा नगरपालिकास्थित सेती गणेश विद्यालयमा निर्वाचनको लागि खटिएका प्रदिप सापकोटाले आफनो फेसबुक पेजमा ‘२१ गते साँझ ५ बजेपछि नेपाली काँग्रेसलाई खोज्न भारत जानुपर्ने हो कि ?’ भनेर लेखेका थिए । उनलाई निर्वाचन सम्पन्न गर्ने क्रममा दिइएको जिम्मेवारीबाट हटाइएको मकवानपुरका प्रमुख जिल्ला अधिकारी चक्रबहादुर बुढाले जानकारी दिए ।

उनको स्थानमा अर्का कर्मचारीलाई जिम्मेवारी दिएको प्रजिअ बुढाले बताए । मकवानपुरगढी गाउँपालिका मक्रान्चुली घर भएका सापकोटाले निर्वाचन आचार संहिता विपरीत फेसबुकमा पोष्ट गरेको स्टाटसको विषयमा जिल्ला प्रशासन कार्यलयमा जानकारी आए पछि आफुले मुख्य निर्वाचन अधिकृतको कार्यलयमा जानकारी गराएको बताउँदै सापकोटाले गल्ति स्विकार गरेको र माफी मागे पछि उनको दायीत्वबाट हटाइएको प्रजिअ बुढाको भनाई छ ।

प्रतिनिधि तथा प्रदेशसभाको निर्वाचनको मिति घोषणा भएदेखि नै फेसबुकमा नेकपा एमालेको प्रचारप्रसार गर्दै आएका जिल्ला पशुसेवा कार्यालय मकवानपुरमा कार्यरत पशु प्राविधिक प्रदीप सापकोटाको विषयमा यस अघि पनि समाचार प्रकाशन र प्रशारण भएको थियो ।

सापकोटाले निर्वाचन आचार संहिता विपरित प्रोफाइल फोटो समेत यसपटक नेकपा एमालेलाई मतदान गरौँ भन्ने राखेका थिए । निर्वाचनमा खटिएको कर्मचारी भएर किन कुनै दलको विरोधमा स्टाटस लेख्नुभो ? भन्ने प्रश्नमा उनले आफूलाई धेरैतिरबाट फोन आएपछि डिलेट गरेको जानकारी दिए । चुनाव गराउन खटिएको कर्मचारीले यस्तो लेख्न मिल्छ भन्ने प्रश्न गर्दा उनले फोन काटेका थिए ।