प्रदेश खेलकुद प्रतियोगिताको आइतबार भव्य उद्घाटन सम्पन्न

८ जेठ, हेटौंडा । बागमती प्रदेश खेलकुद विकास परिषद्को आयोजनामा प्रदेशको राजधानी हेटौंडामा सुरु भएको दोस्रो प्रदेश खेलकुद प्रतियोगिताको आइतबार हेटौंडा ५ मा रहेको पिप्ले–क्याम्पा रंगशालामा भव्यताका साथ प्रतियोगिताको उद्घाटन गरिएको छ । 
राष्ट्रिय कलाकारहरुको सांगीतिक प्रश्तुती, आतिसबाजी तथा नेपाल आर्मी र नेपाल प्रहरीको प्रस्तुती एवम् झाँकीसहित प्रतियोगिताको उद्घाटन गरिएको हो । बागमती प्रदेशका मुख्यमन्त्री शालिकराम जमरकट्टेलले प्रतियोगिताको उद्घाटन गरेका हुन् । 
बागमती प्रदेश खेलकुद विकास परिषद्को आयोजनामा प्रतियोगिता सुरु भएको हो । यस वर्ष विभिन्न १३ वटा खेल विधामा ७९४ पदकका लागि २ हजार ५०२ खेलाडीले प्रतिस्पर्धा गर्दैछन् । पहिलो वर्ष ८ वटा विधामा स्पर्धा भएकोमा यस वर्ष फुटबल, भलिबल, एथ्लेटिक्स, तेक्वान्दो, कराते, बक्सिङ, उसु, जुडो, क्रिकेट, रग्वी, ब्याड्मिन्टन, पौडी र आईटिएफ तेक्वान्दोको खेल सञ्चालन हुँदैछ । 
बागमती प्रदेश खेलकुद विकास परिषद्का सदस्य सचिव सूर्यलाल भण्डारीका अनुसार एकहजार ७५ महिला र एकहजार ४२७ पुरुष गरी २ हजार ५०२ जना खेलाडीले २१९ स्वर्ण, २१९ रजत र ३५६ कास्य गरी ७९४ पदका लागि खेल्नेछन् । पदक विजेता खेलाडीहरुले नगद पुरस्कार समेत प्राप्त गर्नेछन् । 
प्रथम, द्वितीय र तृतीय हुने खेलाडीले क्रमशः जनही नगद ५ हजार, ४ हजार र ३ हजार रुपैयाँ नगद पुरस्कार प्राप्त गर्नेछन् । महिला तथा पुरुष फुटबल, एथ्लेटिक्स, महिला र पुरुष भलिबल, रग्वी, कराते, तेक्वान्दो, आइटिएफ तेक्वान्दो, बक्सिङ र ब्याड्मिन्टनका खेलहरु हेटौंडामा हुनेछ भने उसु र जुडो काठमाडौंमा हुनेछ । 
यस्तै पौडी ललितपुरमा र महिला तथा पुरुष क्रिकेट प्रतियोगिता चितवनमा हुनेछ । प्रतियोगिताका लागि करिब ९ करोड ४२ लाख रुपैयाँ खर्च हुने अनुमान गरिएको छ ।