देशको आर्थिक संकट प्रति बागमती सरकार सचेत छैनः एमाले

१२ जेठ , हेटौंडा । बागमती प्रदेशको प्रमुख प्रतिपक्षी दल एमालेले बागमती प्रदेश सरकार अहिलेको आर्थिक संकट प्रति सचेत नरहेको आरोप लगाएको छ । 
बिहीबार एमाले संसदीय दलको कार्यलयमा पत्रकार सम्मेलन गर्दै प्रदेश संसदीय दलका प्रमुख सचेतक मधुसूधन पौडेलले सरकार वर्तमान आर्थिक संकटको सामना गर्नेगरि अगाडी नबढेको आरोप लगाएका हुन् ।
उनले प्रदेश सरकारले प्रस्तुत गर्ने आगामी बर्षको नीति तथा कार्यक्रममाथीको सुझाव दिँदै सरकारले पुँजीगत खर्च गर्न नसकिरहेको अवस्थामा चालु खर्चमा कटौती गर्न र साधरण खर्च रोक्न सुझाव दिएपनि सरकारले वेवास्त गरेको दावी गरे । 
‘चालु खर्चलाई कटौती गर्न र साधरण खर्च रोक्न सुझाव दिएका थियौं । तर सरकारले ती सुझाव मान्नुको साटो मन्त्रीको संख्या बढाउँने र विना विभागीय मन्त्री बनाउँने जस्ता गैरजिम्मेवार काम गरेको छ ।’ उनले भने । 
प्रमुख सचेतक पौडेलले मन्त्रालयको संख्या १३ पु¥याउँने तयारी भइरहेको आरोप पनि लगाए । प्रमुख सचेतक पौडेलले सरकारका मुख्यमन्त्री शालिकराम जम्मकट्टेल, आर्थिक मामिला तथा योजना मन्त्री बहादुर सिंह लामाका साथै सबै मन्त्रालयहरुलाई एमालेका तर्फबाट सुझाव दिएको बताए । 
सरकारले प्रदेशमा प्रस्तुत गरेको बजेटको शिद्धान्त तथा प्राथमिकतामा आफ्ना सुझावहरु नसमेटिएपछि सरकारले ल्याउँने नीति तथा कार्यक्रममा आफ्ना सुझावहरु समेटिउन भन्ने उद्देश्यले खबरदारी गर्न खोजेको उनले स्पष्ट पारे । उनले आफ्ना सुझाबहरु समेटेर मात्र नीति तथा कार्यक्रम ल्याउन सरकारलाई चेतावनी पनि दिए । 
‘हामीले सरकारलाई नीति तथा कार्यक्रमका लागी संसदबाट र लिखित रुपपनि सल्लाह र सुझाव दिएका छौं । ति सुझाव र सल्लाह आगामी नीति तथा कार्यक्रममा समेटिउन भन्ने हाम्रो चाहान हो ।’ उनले भने ।