प्रदेश सरकारले विविध कार्यक्रम गरी गणतन्त्र दिवस मनाउने

१३ जेठ, हेटौंडा । बागमती प्रदेश सरकारले १६ औं गणतन्त्र दिवस विविध कार्यक्रमकाबीच गणतन्त्र दिवस मनाउने भएको छ । 
दिवसको अवसरमा आयोजना हुने कार्यक्रमको विषयमा शुक्रबार बागमती प्रदेशको आन्तरिक मामिला तथा कानून मन्त्रालयले पत्रकार सम्मेलनमार्फत जानकारी दिएको हो । 
दिवसको अवसरमा हेटौंडा उपमहानगरपालिकाको संयोजनमा मन्त्रालय, कार्यालय तथा सार्वजनिक स्थानको सरसफाई, १५ गते साँझ प्रदेशका सबै मन्त्रालय, कार्यालय र सार्वजनिक एवम् सामुदायिक संघसंस्था एवम् घरघरमा दीपावली गर्ने कार्यक्रम तय भएको प्रदेशका आन्तरिक मामिला तथा कानून मन्त्री गंगानारायण श्रेष्ठले जानकारी दिए ।
यसैगी सार्वजनिक झण्डा फहराउने र ब्यानर प्रदर्शन गर्ने, प्रदेश सरकारको प्रवक्ताबाट पत्रकार र सञ्चार माध्यममार्फत गणतन्त्र दिवसलाई सभ्य र भव्य रुपमा मनाउन अपिल गर्ने, सबै मन्त्रालय तथा निकायले आफ्नो वेभसाइटको होमपेजमा ‘गणतन्त्र दिवस २०८० भव्यताका साथ मनाऔं’ लेखिएको ब्यानर देखाउने, १४ गते स्वास्थ्य मन्त्रालयको संयोजनमा सार्वजनिक रक्तदान कार्यक्रम गरिने मन्त्री श्रेष्ठले बताए ।
उनका अनुसार १६ गते वन तथा वातावरण मन्त्रालयको संयोजनमा वृक्षरोपण, प्रदेश सरकार, विभिन्न राजनीतिक दल र नागरिक समाज प्रतिनिधिबीच अन्तरक्रिया, सञ्चार रजिष्ट्रारको कार्यालयको संयोजन तथा पत्रकार महासंघ बागमती प्रदेश समितिको आयोजनामा ‘गणतन्त्रको १५ वर्ष–अवसर र चुनौती’ विषयमा खुला लेख प्रतियोगिता र प्रदेशमा क्रियाशील पत्रकारलाई प्रोत्साहनका लागि विविध विधामा स्थापित पत्रकारिता पुरस्कार वितरण कार्यक्रम हुनेछ । 
खुला लेख प्रतियोगिताको प्रथम, द्वित्तीय र तृत्तीय हुनेलाई क्रमश ः नगद १५ हजार, १० हजार र ५ हजार रुपैयाँसहित प्रमाणपत्र प्रदान गरिने बताइएको छ । १५ गते बिहान हेटौंडाको बुद्धचोकदेखि मुख्यमन्त्री तथा मन्त्रिपरिषद्को कार्यालय प्राङ्गणसम्म प्रभातफेरीको आयोजना गरिनेछ । 
प्रभातफेरी पश्चात गणतन्त्र दिवस २०८० मूल समारोह समितिको आयोजनामा विशेष समारोह गरिने पत्रकार सम्मेलनमा जानकारी दिइएको छ । विशेष समारोहमा बागमती प्रदेशका प्रमुख, सभामुख, मुख्यमन्त्री तथा मन्त्रीहरुको उपस्थिती रहनेछ ।