सर्वदलिय बैठक सकियो, मकवानपुरमा १२.३० बाट मतगणना हुने

२२ मंसिर, हेटौँडा । मकवानपुरमा विहिबार (हिजा)े सम्पन्न भएको प्रतिनिधि तथा प्रदेशसभा निर्वाचनको मतगणना आज साढे १२ बजेबाट हुने भएको छ । विहान सम्पन्न सर्वदलीय बैठकले मतगणना साढे १२ बजे पछि गर्ने सहमती गरेको हो ।
गएराती ३ बजेसम्ममा सबै मतपेटी मतगणना स्थल मकवानपुर बहुमुखी क्याम्पसमा ल्याइसकिए पछि आज विहानबाट मतगणनाको तयारी सुरु भएको हो ।
दुई वटा प्रतिनिधिसभा र ४ वटा प्रदेशसभाको लागि मकवानपुरमा ६८ जना उम्मेद्वारहरु चुनावी मैदानमा उत्रिएका थिए भने नयाँ शक्ति नेपालका तर्फबाट उम्मेवार बनेका प्रल्हाद लामिछाने र केही स्वतन्त्र उम्मेदवारले उम्मेदवारी फिर्ता लिएका थिए ।
हिजो सम्पन्न मतदानबाट मकवानपुरमा ६६ प्रतिशत खसेको मुख्य निर्वाचन अधिकृतको कार्यलयले जानकारी दिएको छ । मकवानपुरको प्रतिनिधि सभा क्षेत्र नम्बर १ मा कुल मतदाता १ लाख २४ हजार ७ सय ९९ मा ८४ हजार २ सय ६९ अर्थात ६७ प्रतिसत मत खसेको छ । यस्तै क्षेत्र नम्बर २ मा कुल मतदाता १ लाख तीस हजार ८ सय ४ मा ६६ हजार ७ सय ३१ अर्थात ६६.३० प्रतिसत मत खसेको निर्वाचन कार्यलयले जनाएको छ ।
मतगणना स्थल मकवानपुर बहुमुखी क्याम्पसका ६ वटा कोठामा तार जालीले घेरेर मत गणनाको व्यवस्था गरिएको छ ।