हेटौंडाको आर्थिक बर्ष २०८०।८१ को बजेट ११ करोड कम

२ असार, हेटौंडा । हेटौंडा उपमहानगरपालिकाको आर्थिक बर्ष २०८०।८१ को लागि ११ करोड कम बजेट बिनीयोजन गरेको छ । उपमहानगरपालिकाले    अघिल्लो  आर्थिक बर्ष भन्दा आर्थिक वर्ष २०८०।८१ को लागि ११ करोड कम बजेट बिनीयोजन गरेको हो । उपहानगरले आर्थिक बर्ष २०७९।८० का लागि  २ अर्ब ७१ करोड ७९ लाख ७२ हजार रूपैयाको बजेट प्रस्तुत गरेको  थियो। शनिवारको १३ औं नगरसभामा आर्थिक बर्ष २०८०।८१ को लागि २ अर्ब ६० करोड़ ६५ लाख ४० हजार बजेट प्रस्तुत गरेको छ। जुन बजेट उपमहानगरको चालु आवको तुलनामा ११ करोड रुपैयाँ कम हो ।

हेटौंडाका उपमेयर राजेश बानियाँले प्रस्तुत गरेको निती तथा कार्यक्रममा नगरको अनुमानित बजेटमध्ये खर्च व्यहोर्ने स्रोतमध्ये आन्तरिक स्रोतबाट ८३ करोड ६६ लाख ६२ हजार, राजस्व बाँडफाँडबाट ५९ करोड १४ लाख, प्रदेश सरकारको विभिन्न अनुदानबाट ३ करोड ३४ लाख र संघीय सरकारबाट १ अर्ब १४ करोड ५० लाख रुपैयाँ रहेको छ ।

त्यसैगरी सामाजिक विकासतर्फ ९२ करोड ९२ लाख, पूर्वाधार विकासमा ३८ करोड ४० लाख रुपैयाँ, आर्थिक विकासतर्फ ११ करोड ६७ लाख तथा वातावरण तथा विपद् व्यवस्थापनमा ७ करोड १५ लाख विनियोजन गरिएको छ । 
उपमहानगरले एकीकृत बसपार्क तथा टर्मिनल भवन निर्माण गर्न ८ करोड़ रुपैया, हेटौंडा–४ मा बासुदेव बहुउद्देश्यीय व्यापारिक भवन निर्माण गर्न २ करोड, पदमपोखरी मुख्य सडक विस्तार कार्यका लागि ३ करोड ५० लाख रुपैयाँ विनियोजन गरेको छ ।
हेटौंडा अस्पतालको स्तरोन्नतिका लागि ८० लाख, अटो भिलेज निर्माण गर्न ८० लाख, पिप्लेक्याम्पा रंगशाला स्तरोन्नतिका लागि ५० लाख रुपैयाँ विनियोजन गरिएको छ । वडा गौरवको योजनाका लागि ३ करोड ४० लाख रुपैयाँ विनियोजन गरिएको छ ।त्यसैगरी नगरलाई उज्यालो कार्यक्रम अन्तर्गत हाइमास्ट लाईट जडानाका लागि ५० लाख र विभिन्न पूर्वाधारहरुको आकस्मिक मर्मत सम्भारका लागि मर्मत सम्भार कोषबाट २ करोड विनियोजन गरिएको छ।तामाङ सङग्राहलयका निर्माणका लागि ५० लाख विनियोजन गरिएको छ ।