विजय यूथ गोल्डकपः आयोजकको विजयी सुरुवात

६ असार, हेटौंडा । हेटौंडामा सुरु भएको दोस्रो संस्करणको विजय यूथ गोल्डकप फुटबल प्रतियोगितामा आयोजक एफसी विजय यूथले विजयी सुरुवात गरेको छ । उद्घाटन खेलमा अग्रसर यूथ क्लवलाई ३–२ गोल अन्तरले हराउँदै विजय यूथले विजयी यात्रा सुरु गरेको हो । 
विजय यूथका लागि विदेशी खेलाडी ग्लोरीले दुई तथा शान्ता गुरुङले एक गोल गरे । यस्तै अग्रसरको लागी अजय सापकोटा र रोशन बलामीले एक÷एक गोल फर्काए । दुई गोल गरेका ग्लोरी नै खेलको म्यान अफ द म्याच भए । 
प्रतियोगितालाई मकवानपुर जिल्ला खेलकुद विकास समितिका अध्यक्ष भेष खड्गीले उद्घाटन गरेका हुन् । खड्गीले यस्ता प्रतियोगिताले खेलाडी उत्पादनमा महत्वपूर्ण योगदान पु¥याउने विश्वास व्यक्त गरे । यस्ता प्रतियोगितालाई स्थानी सरकार एवम् संघसंस्थाले सहयोग गर्नु जरुरी रहेको उनको भनाई थियो । 
प्रतियोगिताको उद्घाटन कार्यक्रम आयोजक विजय यूथ क्लवका अध्यक्ष सुदीप राजबाहकको अध्यक्षतामा भएको थियो । कार्यक्रममा क्लवका सचिव राजेश भेटवालले सहजिकरण गरेका थिए । 
१५ गतेसम्म सञ्चालन हुने प्रतियोगिताको विजेताले २ लाख र उपविजेताले एकलाख रुपैयाँसहित ट्रफी, मेडल र प्रमाणपत्र प्राप्त गर्नेछ । यस्तै सर्वोत्कृष्ट खेलाडीलाई ५ लाख बराबरको बीमा र नगद १० हजार तथा विधागत उत्कृष्ट खेलाडी र प्रशिक्षकलाई जनही नगद ५ हजार रुपैयाँसहित ट्रफी प्राप्त गर्नेछन् । 
प्रतियोगितामा मकवानपुरका क्लवहरु हेटौंडा फुटबल एकेडेमी, विजय यूथ क्लव, हटिया भेट्रान्स क्लव, ढल्के जोवान एफसी, रिगल हेटौंडा रिसोर्ट मकवानपुर, नागस्वती एफसी, पदमपोखरी युनाइटेड, हर्नामाडी यूथ क्लव, एफसी विजय यूथ, अग्रसर यूथ क्लव, समाजकल्याण एफसी, बागमती प्रदेश प्रहरी गण, चाइना पब्लिक यूथ क्लव, चौकीटोल यूथ क्लव, पशुपति युवा क्लव र हेटौंडा फुटबल एकेडेमी ‘ए’ गरी १६ टिम सहभागी छन् ।