मनहरीका १८ प्रधानाध्यापकले दिए सामुहिक राजीनामा

३० असार, हेटौंडा । मकवानपुरको मनहरी गाउँपालिकामा रहेको १८ वटा विद्यालयका प्रधानाध्यापकले सामुहिक राजीनामा दिएका छन् । गाउँपालिकाले विना कारण प्रधानाध्यापकहरुको सरुवा गर्न खोजेको भन्दै उनीहरुले राजीनामा दिएको बताएका छन् ।
साउन १ गतेदेखि लागू हुने गरी राजीनामा दिइएको प्रधानाध्यापकहरुद्वारा हस्ताक्षरित राजीनामा पत्रमा उल्लेख छ । राजीनामा दिनेमा एक मावि र १७ प्राथमिक तहका प्रधानाध्यापक रहेका छन् । 
सिकाई उपलब्धीमा पहिलो भएको सहित पालिकाभरका सबै प्राथमिक तहको विद्यालयका प्रधानाध्यापकलाई विना कारण सरुवा गर्न लागेकोले बाध्य भएर राजीनामा दिएको नेपाल शिक्षक महासंघ मनहरी गाउँपालिका अध्यक्ष नवराज डोटेलले जानकारी दिए ।
राम्रो सक्षम प्रधानाध्यापक ल्याउनका लागि राजीनामा दिएर बाटो खोलिदिएको उनले बताए । आर्थिक हिनामिना वा कुनै अभियोग लागेको जसरी सबैलाई एकमुष्ट सरुवा गर्न खोजेको भन्दै प्रधानाध्यापकहरुले आपत्ति जनाउँदै आएका छन् ।
मनहरी गाउँपालिकामा ३२ वटा विद्यालय रहेकोमा १८ वटा प्रावि, ५ वटा निमावि र ९ वटा मावि रहेको छ । शिक्षा नियमावलीमा शिक्षक सरुवा गर्ने व्यवस्था भएपनि प्रधानाध्यापक सरुवाको विषयमा भने केही उल्लेख गरिएको छैन ।
धेरै प्रअ सहमत छन्, केहीले बखेडा गरेः अध्यक्ष कालाखेती
यता मनहरी गाउँपालिकाका अध्यक्ष रञ्जन कालाखेतीले भने गाउँपालिकाले गरेको सरुवाको निर्णयमा धेरै प्रधानाध्यापक सहमत भैसकेको जानकारी दिँदै शिक्षक महासंघका अध्यक्ष नवराज डोटेलले अनावश्यक बखेडा झिक्न खोजेको प्रतिक्रिया दिएका छन् ।
‘अहिले सार्वजनिक गरिएको राजीनामा करिब १० दिन अगाडीको हो । हामी गाउँपालिकाको शिक्षा र स्वास्थ्य क्षेत्रको सुधार अभियानमा छौं’, उनले भने, ‘सरुवाको विषय वहाँहरुले नबुझेकोले हो । प्रधानाध्यापकहरुलाई सकेसम्म आपसी समझदारीमा सरुवा हुनुहोस् भनेका हौं, वहाँहरुले नमानेपछि हामीले सरुवा गर्न लागेका हौं ।’ 
मनहरी गाउँपालिकाले शिक्षकहरुलाई प्रत्येक महिना तलब खुवाउने, उत्कृष्ट शिक्षकलाई पुरस्कार र सम्मान गर्ने, प्रधानाध्यापक भत्ता ५ सयबाट बढाएर दुईहजार पु¥याउने अभियानमा रहेको कालाखेतीले जानकारी दिए ।
‘शिक्षा क्षेत्र सुधार्ने विषयमा सबै प्रधानाध्यापकहरुको साथ जरुरी छ । सकेसम्म आपसी समझदारीमै सरुवा हुन समय दिनेछौं । यो गाउँपालिकाको शिक्षा समितिले गरेको निर्णय हो’, उनले भने, ‘कसैले मान्दिन भन्छ भने हामी कानून अनुसार अघि बढ्नेछौं ।’