गुणस्तरको समस्या समाधानमा एकिकृत प्रयास जरुरी

२८ मंसिर, हेटौँडा । मकवानपुरका प्रमुख जिल्ला अधिकारी चक्रबहादुर बुढाले बजारमा देखिएको खाद्य गुणस्तरसम्बन्धी समस्या समाधानका लागि सराकोरवाला निकायको एकिकृत प्रयास जरुरी रहेको बताएका छन् । 
क्षेत्रीय खाद्य तथा गुण नियन्त्रण कार्यालय हेटौंडाले गरेको समिक्षा एवं अन्तरक्रिया कार्यक्रममा बोल्दै प्रमुख जिल्ला अधिकारी बुढाले गुण नियन्त्रण कार्यालयले आप्mनो क्षेत्रबाट काम गरिरहेको बताउँदै यसमा नागरिक समाज, उपभोक्तावादी संघसंस्था, उपभोक्ता र संचारमाध्यमको पनि प्रयास आवश्यक रहेको बताए । उनले बजारमा देखिएका समस्याबारे प्रशासन वा गुण नियन्त्रण कार्यालयमा जानकारी दिए आफुहरु कारवाहीका लागि तत्पर रहेको बताउँदै यसमा सबैको साथ आवश्यक रहेको बताए । 
कार्यक्रममा बोल्दै नेपाल पत्रकार महासंघ मकवानपुरका अध्यक्ष हरि हुमागाईले चाडपर्व लक्षित नियमित बजार अनुगमनसंगै अन्य समयमा पनि आकस्मिक अनुगमनमा जोड दिनुपर्ने धारणा राखेका थिए । कार्यक्रममा उपभोक्ता हित संरक्षण मञ्च मकवानपुरका अध्यक्ष बासु खतिवडा, सरकारी वकिल कार्यालयका न्यायाधिवक्ता हरि भट्ट, खाद्य निरीक्षक कौशल ओझा लगायतले मन्तव्य व्यक्त गरेका थिए । 
कार्यालयका प्रमुख राजकुमार रिजालको अध्यक्षतामा भएको कार्यक्रममा उपभोक्तावादी संघसंस्थाका प्रतिनिधि, उद्योगी, व्यवसायी, विभिन्न कार्यालयका प्रतिनिधि, संचारकर्मी लगायतको सहभागिता रहेको थियो ।