मक्रान्चुलीमा फुटसल पिचको शिलान्यास

२९ मंसिर, हेटौँडा । मकवानपुरगढी गाउँपालिका वडा नम्बर ३ मक्रान्चुलीमा फुटसल पिच निर्माण हुने भएको छ । फुटसल निर्माणको आज अखिल नेपाल फुटबल संघ ( एन्फा) का वरिष्ठ उपाध्यक्ष मणीकुमारले शिलान्यास गरेका हुन् । फिफाको सहयोग तथा गढी स्पोटर्स क्लव र भानु माविको आयोजनामा शिलान्यास कार्यक्रम भएको हो । 
ग्लोबल टेन्डर लेभन्टा ईटालीयन कम्पनीको सहयोग र दक्षिण एशियाली देश हेर्ने साईन्टोकोस स्पोटर्स प्राइभेट लिमिटेडको प्राविधिक सहयोगमा करीव ३ करोड १५ लाखको लागतमा फुटसल निर्माण हुने जनाईएको छ । फुटसलको निर्माण कार्य १ महिना भित्रमा सम्पन्न गर्ने लक्ष्य राखिएको मकवानपुर जिल्ला फुटबल संघका प्रथम उपाध्यक्ष मनिष श्रेष्ठले बताए । एन्फाले काठमाण्डौं,नवलपरासी र मकवानपुर जिल्लाको ३ ठाउँमा फुटसल निर्माण गर्ने बताएको छ । 
भानु मावि विद्यालय व्यवस्थापन समिति अध्यक्ष खिलप्रसाद चौलागाईको सभाध्यक्षतामा भएको शिलान्यास कार्यक्रममा मकवानपुरगढी ३ का वडा अध्यक्ष भागवत घिमिरे, मकवानपुर जिल्ला फुटबल संघका अध्यक्ष राजेन्द्र श्रेष्ठ,भानु माविका प्रधानाध्यापक ध्रुव भुजेल,पूर्व प्रधानाध्यापक कृष्ण पोखरेल,रानी सामुदायिक वन उपभोक्ता समूहका अध्यक्ष कृष्ण विडारी,मनकामना दुग्ध उत्पादक सहकारी संस्था अध्यक्ष तेजप्रसाद लम्साल लगायतकाले खेल क्षेत्रको लागि आफूले सक्दो सहयोग गर्ने बताए । 
फुटसल निर्माण भएपछि यस क्षेत्रको खेलकुद मात्रै हैन स्थानीय क्षेत्रको समेत विकासमा महत्वपूर्ण सहयोग पुग्नेमा स्थानीय विश्वस्त छन् ।