मन्त्रालय फुटाएर बागमतीमा विना विभागीय मन्त्रीले पाए मन्त्रालय

२१ साउन,हेटौँडा । बागमती प्रदेशमा बिना विभागीय मन्त्रीको नियुक्ती पाएका ७७ दिनपछि एकजना मन्त्रीले मन्त्रालय पाएका छन् । सालिकराम जम्कट्टेले नेतृत्व प्रदेश सरकारको जेठ ७ गते विनाविभागीय मन्त्रीको रुपमा शपथग्रहण गराएका रामकृष्ण चित्रकारले आइतबारबाट उद्योग तथा सामान्य प्रशासन मन्त्रालयको जिम्मेवारी पाएका हुन् । कांग्रेस बागमती प्रदेशसभा संसदीय दलको उपनेता  समेत रहेका उनलाई विना विभागीय बाट विभागीय मन्त्रीको हैसियत दिलाउन बागमती प्रदेश सरकारले एउटा मन्त्रालय नै फुटाएको छ । माओवादी नेतृत्वमा रहेको सरकारमा कांग्रेसलेका मन्त्रीले सम्हालेको पर्यटन, उद्योग तथा सहकारी मन्त्रालय फुटाएर चित्रकारलाई उद्योग तथा सामान्य प्रशासन मन्त्रालयको जिम्मेवारी दिइएको हो । चित्रकार कांग्रेसका प्रदेशसभा सदस्या हुन् । 
सत्ता गठवन्धन दलहरु भित्र माओबादीका मन्त्रीले सम्हालेको भौतिक मन्त्रालय फुटाउनुपर्छ भन्ने अडान कसेको कांग्रेसले माओवादीले टेरपुच्छर नदिएपछि बाध्य भएर आफैले नेतृत्व गरेका मन्त्रालय फुटाएको हो । मन्त्रालय विभाजनको विषयमा लामो समयदेखि सत्तारुढ नेकपा माओवादी केन्द्र र नेपाली कांग्रेसबीच विवाद रहँदै आएको थियो ।सरकार गठनको समयमा उच्चस्तरीय समिति निर्माण गरी मन्त्रालयको संख्या १० प्रतिशतमा सीमित राख्ने प्रतिबद्धता जनाएका मुख्यमन्त्री जम्कट्टेले मन्त्रालय विभाजनसँगै उनको प्रतिवद्धताले हावा खाएको छ । एउटा मन्त्रालय थपिएसँगै वाग्मती प्रदेशमा अब मन्त्रालयको संख्या १२ पुगेको छ ।