नेपाललाई एसीसी अण्डर १६ क्रिकेटको उपाधि

२ पुस, हेटौँडा । थाईल्याण्डमा सम्पन्न एसीसी अण्डर १६ ईष्टर्न रिजन क्रिकेट प्रतियोगिताको उपाधि नेपालले हात पारेको छ । फाइनलमा आइतबार सम्पन्न खेलमा सिंगापुरलाई ७१ रनले पराजित गर्दै नेपालले हात पारेको हो ।

१ सय ८४ रनको लक्ष्य पछ्याएको सिंगापुर ३१ दशमलव ५ ओभरमा १ सय १२ रनमा प्याक भएपछि नेपाल ७१ रनले विजयी भएको हो । अजय कुमार लोनिया र सूर्य तामाङको कसिलो बलिङ सामू सिंगापुरका ब्याट्सम्यानहरु निरीह देखिएका थिए । ७ ओभर बलिङ गरेका सूर्यले १ मेडनसहित २० रन खर्चेर ३ विकेट लिए । त्यस्तै ५ ओभर बलिङ गरेका अजयले १६ रन खर्चेर ३ विकेट लिए । सिंगापुरका श्रीहर्ष वेणुगोपालले ३१ र आर्नभ वाध्वाले २१ रन जोडे । राउल शर्माले १५ र इशान सनीले १२ रन जोड्नबाहेक अन्यले दोहोरो अंकको स्कोर छुन सकेनन् । 

टर्डथाई क्रिकेट मैदानमा टस जितेर ब्याटिङ थालेको नेपालले निर्धारित ओभरमा ६ विकेटको क्षतिमा १ सय ८३ रन जोडेको थियो । पहिलो विकेट ३ रन जोड्दा गुमाएको नेपालको इनिङ्स क्याप्टेन विशालविक्रम केसी र सुनिल भण्डारीले पाँचौ विकेटका लागि गरेको ४२ रनको साझेदारीले उकास्यो । त्यस्तै छैटौं विकेटका लागि विशाल र नारायण जोशीले ४८ रन जोडेपछि नेपाल उच्च योगफलतर्फ लम्किएको थियो । विशालले आज ६३ रन जोडे । नारायण जोशी ४६ रनमा अविजित रहेको खेलमा सुवास ऐरले २२,  त्रितराज दासले १९ र सुनिल भण्डारीले १५ रन जोडे । प्रतिश जि।सी १० रनमा अविजित रहे ।

प्रतियोगितामा नेपालबाट सर्वाधिक रन बनाउने खेलाडी तृतराज दास रहे । उनले ३२ दशमलव ४० को औसतमा ५ म्याचमा १ सय ६२ रन जोडे । उनी प्रतियोगिताका सर्वाधिक रन बनाउने खेलाडी समेत हुन् । त्यस्तै क्याप्टेन विशालले १ सय ३६ रन जोडे । बलिङतर्फ नेपालका नारायण जोशीले सर्वाधिक १० र सूर्य तामाङले ९ विकेट लिए । 

स्रोत : इकान्तिपुर