मातृभूमिले प्राडा जगमान गुरुङ र प्राडा विदुर चालिसेलाई सम्मान गर्ने

११ भदौ, हेटौंडा । ‘मातृभूमि राष्ट्रिय सम्मान २०८०’ बाट वरिष्ठ संस्कृतिविद् एवं प्रज्ञा प्रतिष्ठानका पूर्व उपकुलपति प्राध्यापक डा. जगमान गुरुङ सम्मानित हुनेभएका छन् । मकवानपुरको अग्रणी साहित्यीक संस्था मातृभूमि साहित्य समाज मकवानपुरले प्रत्येक दुई वर्षमा प्रदान गर्दै आएको उक्त सम्मान यसवर्ष प्राडा गुरुङलाई प्रदान गर्न लागिएको समाजका अध्यक्ष माधव पोखरेलले जनाकारी दिए ।
नेपाली संस्कृति क्षेत्रमा महत्त्वपूर्ण योगदान पु¥याए बापत प्राडा गुरुङलाई नगद २५ हजार एक राशिको उक्त पुरस्कार प्रदान गर्न लागिएको अध्यक्ष बताए । नेपाल प्रज्ञा प्रतिष्ठानका पूर्व उपकुलपति प्राडा जगमान गुरुङ नेपाली इतिहास एवं संस्कृति क्षेत्रका गहन अध्येता पनि हुन् । विभिन्न प्रतिष्ठान तथा विश्वविद्यालयको महत्त्वपूर्ण जिम्मेवारी सम्हालेका गुरुङको शोधपत्र लेखन एवं अनुसन्धान कार्यमा गहन भूमिका रहेको छ ।
यस्तै समाजले मातृभूमिले संस्थाका कार्यसमिति सदस्य किशन पौडेलद्वारा स्थापना गरेको नगद ११ हजार १११ राशिको  ‘मातृभूमि लघुकथा रत्न सम्मान–२०७९’ बाट ‘लघुकथालय’का सर्जक वरिष्ठ लघुकथाकार डा.विदुर चालिसेलाई प्रदान गर्ने निर्णय गरेको छ । लामो समयदेखि लघुकथाको क्षेत्रमा कलम चलाउँदै आएका डा.चालिसेमा नेपाली भाषामा विभिन्न लघुकथा संग्रह, कविता, भाषा, अनुसन्धान र समालोचनाका पुस्तकहरू प्रकाशित रहेका छन् ।
दुबै पुरस्कार तथा सम्मान आउँदो ६ गते मातृभूमि साहित्य समाजको २५औँ वर्षको अवसरमा आयोजना हुने विशेष कार्यक्रममा प्रदान गरिने अध्यक्ष पोखरेलले जानकारी दिए । उक्त कार्यक्रममा महाकाव्यकार मुना अर्यालको दोस्रो महाकाव्य ‘महाकाश’को विमोचन पनि गरिने खध्यक्ष पोखरेलले बताए ।