भदौ १४ गतेबाट नवोदय मुन हुने

१२ भदौ, हेटौंडा । विद्यार्थीको नेतृत्व विकासको लक्ष्यसहित हेटौंडामा रहेको नवोदय शिशु सदन अंग्रेजी माविले नमूना संयुक्त राष्ट्रसंघको अभ्यास (नवोदय मुन) को आयोजना गर्ने भएको छ । यही भदौ १४ देखि २६ गतेसम्म हुने कार्यक्रमको तयारी करिब अन्तिम चरणमा पुगेको आयोजकले जानकारी दिएको छ । 
विद्यार्थीको नेतृत्व विकाससँगै सामुहिक छलफलबाट आफ्ना विचार र धारणा पस्किने, गतिविधिमा आधारित शिक्षालाई प्राथमिकता दिने तथा अन्तर्राष्ट्रिय सम्बन्ध तथा नीति नियम, योजना तथा समस्याको समाधानका लागि नवोदय मुनको आयोजना गरिएको नवोदय नमूना संयुक्त राष्ट्रसंघका महासचिव रायन खनालले जानकारी दिए । 
तीनदिन सम्म सञ्चालन हुने कार्यक्रममा विश्व स्वास्थ्य संगठन, संयुक्त राष्ट्र सुरक्षा परिषद्, आर्थिक र वित्तिय मामिला परिषद्, खाद्य र कृषि संगठन, अन्तर्राष्ट्रिय श्रम संगठन, संयुक्त राष्ट्र पर्यावरण कार्यक्रम, प्रतिनिधिसभा लगायतका विषयमा छलफल अन्तरक्रिया हुने आयोजकले जानकारी दिएको छ । 
कार्यक्रममा नवोदयसहित मकवानपुर र चितवनका विभिन्न विद्यालयको विद्यार्थीको सहभागिता रहनेछ । सहभागीहरुलाई परिचयात्मक र रमाइलो वातावरण सिर्जना गर्न कार्यक्रम डिजाइन गरिएको नवोदय नमूना संयुक्त राष्ट्रसंघका महासचिव खनालले बताए । कार्यक्रममा नृत्य प्रदर्शन, खेल, खाजा, डिनर, फोटोबुथ, मेमोरी बोर्ड र रमाइला गतिविधि समावेश हुने बताइएको छ ।