बहराइनमाथि नेपालको एकपक्षीय जित

१५ भदौ, काठमाडौं । नेपालले आइसिसी महिला टी-२० विश्वकप एसिया क्षेत्र छनोटको दोस्रो खेलमा बहराइनमाथि एकपक्षीय जित हासिल गरेको छ । शुक्रबार भएको खेलमा नेपालले बहराइनलाई १० विकेटले पराजित गर्दा १७ बलमा नै लक्ष्य पूरा गरेको थियो ।
मलेसियामा भएको खेलमा टस जितेर पहिला ब्याटिङ रोजेको बहराइन १५.४ ओभरमा ३१ रनमा अल आउट भएपछि नेपालले ३२ रनको लक्ष्य पाएको थियो ।
बहराइनकी कप्तान दीपिकाले २० बलमा १ चौकासहित सर्वाधिक ११ रन बनाइन्। नेपालको बलिङ सामु बहराइनका १० खेलाडीले दोहोरो अंकमा रन बनाउन सकेनन्। उसका ६ खेलाडी शून्यमा आउट भएका थिए ।
नेपालको जितमा इन्दु बर्माले ३ विकेट लिंदा लेग स्पिनर खुशी डंगोलले २ विकेट लिइन्। त्यस्तै कविता कुँवरले १ विकेट लिँदा पुजा महतो र रुविना क्षेत्रीले पनि समान १-१ विकेट लिएका थिए।
३२ रनको लक्ष्य पछ्याएको नेपालले २.५ ओभरमा कुनै विकेट नगुमाई पूरा गर्यो। नेपालको जितमा ओपनर कविता कुँवर १४ बलमा ३ चौकासहित १८ रनमा अविजित रहिन्। त्यस्तै सीताराना मगर ३ बलमा २ रन बनाउँदा नेपालले जित हासिल गरेको थियो।
यसअघि नेपालले पहिलो खेलमा घरेलु टोली मलेसियालाई पाँच रनले हराएको थियो । नेपालले अव आइतबार भुटान, मंगलबार कतार र बुधबार युएईसँग खेल्नेछ ।
समूह ‘बी’मा चीन, हङकङ, कुवेत, म्यानमार र थाईल्यान्ड छन् । शीर्ष दुई टोली सेमिफाइनल खेल्नेछन् । फाइनल पुग्ने दुई टोलीले २०२४ मा ग्लोबल महिला टि-२० विश्वकप खेल्न पाउनेछन् ।