बागमती प्रदेश सभाको बैठक आजबाट बस्दै 

file photo

१८ भदौ, हेटौंडा । पर्याप्त बिजनेस नुहँदा दुई महिनासम्म बस्न नसकेको बागमती प्रदेश सभाको बैठक आज सोमबारबाट बस्दै छ । प्रदेश सरकारको चालु आर्थिक वर्ष २०८०÷०८१ को बजेट पारित भएसँगै स्थगित गरिएको बागमती प्रदेश सभाको बैठक दुई महिनापछि बस्न लागेको हो । 
बिजिनेसविहीन अवस्थामा रहेको प्रदेश सभा बैठकले यसपटक भने केहि बिजनेस पाउँने भएको छ । बागमती प्रदेश सभा सचिवालयका सूचना अधिकारी सुन्दर बास्कोटाले प्रदेश सरकारका तर्फबाट सचिवालयमा अहिलेसम्म तीनवटा विधेयक दर्ता भएको जानकारी दिए । 
अधिकारी बास्कोटाका अनुसार सचिवालयमा आन्तरिक मामिला तथा कानुन मन्त्रालयले विज्ञान, प्रविधि, नवप्रवर्तन तथा विकास कोष सञ्चालन सम्बन्धमा व्यवस्था गर्न बनेको विधेयक, प्रदेश स्वास्थ्य सेवा ऐन २०७५ लाई संशोधन गर्न बनेको विधेयक र प्रदेश सञ्चार माध्यम व्यवस्थापन ऐन, २०७५ लाई संशोधन गर्न बनेको विधेयक पनि प्रदेश सभा सचिवालयमा दर्ता भएको छ । 
प्रदेश सभाका सभामुख भुवनकुमार पाठकले सोमबार दिउँसो १ः३० बजेका लागि बैठक बस्ने समय निर्धारण गरेको सूचना अधिकारी बास्कोटाले जानकारी दिए । यसअघि आज विहान ११ बजे बस्ने कार्य व्यवस्था परामर्श समितिको बैठकले बैठकको कार्यसूचि निर्धारण गर्ने छ ।