हेटौँडामा वृहत पदयात्रा तथा संयुक्त दिक्षान्त समारोह सम्पन्न

२५ भदौ, हेटौंडा । हेटौंडामा वृहत पदयात्रा तथा संयुक्त दिक्षान्त समारोह सम्पन्न भएको छ ।
पेन्गोलिन (सालक) ओपन स्काउट क्रियुको आयोजनामा 'सानो पाइला पदयात्रामा दौड, पर्यटन विकासमा स्काउटको जोड' भन्ने मुल नाराका साथ कार्यक्रम भएको हो । पदयात्रा कार्यक्रम राप्ती किनारबाट शुरू भई पाथिभरा, डाङ्डुङे हुँदै सहिद स्मारक हेटौडामा पुगेर समापन भएको थियो ।
हेटौडाका विभिन्न विद्यालयका ६०० जना भन्दा बढी विद्यार्थीको सहभागिता रहेको कार्यक्रममा उपस्थित स्काउट विधार्थीलाई अशोक सारु मगरले प्रतिज्ञा गराउँदै ४ सय ५० जनाको सामुहिक दिक्षान्त गरिएको थियो । कार्यक्रममा ज्ञानोदय बालबाटिका, हेटौँडा एकेडेमी, कृष्ण आदर्श फेमकल एकेडेमी, प्रगती, श्रमिक, महेन्द्र किरण, बाल उज्जवल, रोटरी, महेन्द्र, बुद्ध, जनप्रिय मावि तथा हेटौडा बाहिरका चतुर्मुखी मावि चितवन लगायत विद्यालयको सहभागीता रहेको थियो ।
अस्मिता नेपालकी आरती पाठकको सभाध्यक्षता, बागमती प्रदेश सामाजिक विकास मन्त्री कुमारी मोक्तानको प्रमुख आतिथ्यता एवं बागमती प्रदेश युवा परिषदका कार्यकारी उपाध्यक्ष सन्तोष चौलागाईको विशेष आतिथ्यतामा कार्यक्रम भएको थियो ।
कार्यक्रममा नेपाल स्काउट बागमती प्रदेश सदस्य तथा क्रयु रोभर लिडर अशोक सारु मगर, स्काउट बागमती प्रदेशका सदस्य महेन्द्र राना मगर, वडा नम्बर ११ की अध्यक्ष जुना दाहाल, सूर्य  विनायक नगरपालिका भक्तपुरका संयोजक शिव कुमार, थाहा नगर समितिका संयोजक गणेश मान श्रेष्ठ, शंकरापुर नगर काठमाडौका सदस्य सुरेन्द्रकार रन्जित लगायतको उपस्थिति रहेको थियो ।