चिकित्सक कुटपिट घटनाः दुई जनाविरुद्ध किटानी जाहेरी

३० भदौ, हेटौंडा । भदौ २७ गते बुधबार भएको चिकित्सक कुटपिट घटनामा संलग्न रहेको अभियोगमा हेटौंडा १२ का दुईजना विरुद्ध जिल्ला प्रहरी कार्यलय मकवानपुरमा किटानी जाहेरी परेको छ ।
नेपाल चिकित्सक संघले शुक्रबार बिहान् हेटौंडा १२ का २९ बर्षिय अनुप प्रधान र १९ बर्षिय रोहित प्रधानविरुद्ध किटानी जाहेरी दिएको हो । उनिहरुलाई हेटौंडा १ मा रहेको सञ्चो अस्पतालका चिकित्सकद्वय डाक्टर बिकास थापा र डाक्टर प्रशान्त बिडारीलाई कुटपिट गरेको अभियोगमा प्रहरीले बिहीबार नै पक्राउ गरिसकेको छ ।
यस्तै घटनामा संलग्न रहेको अभियोगमा बिहीबार नै हेटौँडा १२ कै रमा प्रधान र रमिता प्रधानलाई पनि प्रहरीले पक्राउ गरेको छ । गत साउन २५ गते सन्चो अस्पतालमा उपचारका लागि आएका ४१ वर्षीय राजेश प्रधानको मृत्युको विषयलाई लिएर चिकित्सकद्वय थापा र बिडारीमाथी उनीहरुले कुटपिट गरेका थिए ।
जिल्ला प्रहरी कार्यालय मकवानपुरका प्रवक्ता एवं डीएसपी लक्ष्मी भण्डारीले दुई जनाविरुद्ध किटानी जाहेरी दर्ता भएको जानकारी दिए । जाहेरी नेपाल चिकित्सक संघका केन्द्रीय अध्यक्ष अनिल विक्रम कार्कीले दिएका हुन् ।
जहारीमा घटनमा संलग्न देखिएका सबैजनालाई चाँडोभन्दा चाँडो पक्राउ गरी प्रचलित कानुन अनुुसार कारबाही गर्नुपर्ने माग गरिएको प्रवक्ता भण्डारीले बताए ।
यसैबिच प्रहरीले चिकित्सक कुटपिट घटनामा पक्राउ परेका चारजनामाथि अनुसन्धान गर्न जिल्ला अदालत मकवानपुरबाट ३ दिनको म्याद थप गराएको छ । पक्राउ परेका ४ जनालाई प्रहरी हिरासतमा राखी अनुसन्धान गर्न जिल्ला अदालत मकवानपुरबाट ३ दिनको म्याद थप गरिएको प्रवक्ता भण्डारीले जाननकारी दिए ।
उनले घटनामा संलग्न भएका अन्यलाई सिसिटिभी फुटेज र पक्राउ परेकाहरुको बयानको आधारमा पक्राउ गर्ने बताए । प्रहरीले टेक्निकल र म्यानुअल सिस्टमबाट घटनाको अनुसन्धान थालेको उनको भनाई छ ।