हेटौंडा अस्पतालका ७९ जनाले बुझाए राजिनामा 

३० भदौ, हेटौंडा । बुधबारको घटनाले काम गर्ने वातावरण नरहेको भन्दै हेटौंडा अस्पतालमा कार्यरत ७९ जना चिकित्सक एवं स्वास्थ्यकर्मीहरुले सामुहिक राजिनामा दिएका छन् ।
उनीहरुले स्थानीय प्रशासनले सुरक्षाको प्रत्याभूति दिलाउन नसकेको र त्रासपूर्ण वातावरणमा काम गर्न सक्ने अवस्था नरहेकोले सामुहिक राजीनामा बुझाएको जनाएका छन् । उनीहरुले अस्पतालका मेसु डाक्टर सापकोटालाई राजिनामा बुझाएका हुन् ।
घटनामा संलग्न सबैलाई तत्काल पक्राउ गरी कारबाही नगरे डा. सापकोटा आफुले समेत उक्त राजीनामा पत्रमा हस्ताक्षर गरी प्रमुख जिल्ला अधिकारीलाई बुझाउने बताए ।
यता मकवानपुरका प्रमुख जिल्ला अधिकारी सूर्य सेढाईले स्वास्थ्य संस्थाहरु बन्द गरेर आन्दोलन गर्दा धेरै सेवाग्राही मर्कामा पर्ने भएकाले चिकित्सकहरुलाई आफनो काममा फर्किन आग्रह गरेका छन् । नयाँ पत्रिकासँग कुरा गर्दै प्रजिअ सेढाईँले चिकित्सकहरुलाई आन्दोलनको स्वरुप परिवर्तन गर्न पनि आग्रह गरेका छन् ।
यस्तै उनले चिकित्सकलाई कुटपिट गर्नेहरुलाई पक्राउ गरी कारबाहीको दायरामा ल्याउँने प्रतिवद्धता पनि व्यक्त गरेका छन् । उनले गलत गर्ने कसैलाई पनि नछोड्नो दावी गर्दै चिकित्सकहरुमाथीको कुटपिटको घटनालाई आफुले गम्भिरतापूर्वक लिएको बताए ।

घटनाको बिरोधमा हेटौंडाका स्वास्थ्य संस्थाको आकस्मिक बाहेक सबै सेवा बन्द 
चिकित्सक कुटपिट घटनाको बिरोधमा शुक्रबार हेटौंडाका सम्पूर्ण स्वास्थ्य संस्थाका आकस्मिक बाहेकका सबै सेवा पूर्ण रुपमा बन्द गरिएको छ । 
हेटौंडाका सरकारी तथा निजी स्वास्थ्य संस्थाका आकस्मीक बाहेका सबै सेवा प्रवाह बन्द गरिएको हो । मकवानपुरको एकमात्र सरकारी अस्पताल हेटौंडा अस्पतालले पनि शुक्रबार आकस्मीक र फार्मेसि बाहेकका सबै सेवा बन्द गरिएको थियो ।
स्थानीय प्रशासनले सुरक्षाको प्रत्याभूति दिलाउन नसकेको र त्रासपूर्ण वातावरणमा काम गर्न सक्ने अवस्था नरहेकोले आकस्मिक बाहेकका सेवा बन्द गरिएको हेटौंडा अस्पतालका मेसु डाक्टर रामचन्द्र सापकोटाले बताए ।
बुधबारको घटनाले चिकित्सक तथा स्वास्थ्यकर्मीहरू काम गर्न सक्ने मनस्थितिमा नरहेका उनको भनाई छ । घटनाको विरोधमा हेटौँडा अस्पतालको आकस्मिक र फार्मेसी सेवा सञ्चालनमा रहे पनि ओपिडी, बिरामी भर्ना र ल्याबलगायतका सेवा बन्द रहेको डा. सापकोटाले जानकारी दिए । 
डाक्टर सापकोटाले घटनामा संलग्न सबैलाई पक्राउ गरी कारबाही गर्न प्रहरीले तदारुकता नदेखाउँदा स्वास्थ्यकर्मीहरू त्रासमा रहेको दाबी गरे । उनले घटनामा संलग्न सबैलाई पक्राउ गरेर कारबाही प्रक्रिया अगाडि नबढाएसम्म आफूहरू पूर्ण रूपमा काममा फर्कन नस्कने बताए