मकवानपुरका चिकित्सक र स्वास्थ्यकर्मीहरूले सेवा सुचारू गर्ने

३१ भदौ, हेटौंडा । चिकित्सक कुटिएको विरोधमा आकस्मिक बाहेकका सेवा ठप्प पारेर आन्दोलन गरिरहेका मकवानपुरका चिकित्सक र स्वास्थ्यकर्मीहरूले सेवा सुचारू गर्ने भएका छन् ।
उनीहरूले आन्दोलनको स्वरूप परिवर्तन गर्दै सोमबारदेखि सेवा सुचारू गर्ने भएका हुन् । 
बिगत ४ दिन देखि मकवानपुरमा रहेका सरकारी अस्पतालहरु तथा गैरसरकारी क्लिनिकहरु, पोलीक्लिनिकहरुबाट प्रदान गरिने आकास्मिक बाहेक स्वास्थ्यसेवा हरु ठप्प हुँदा सर्वसाधारणमा अप्ठ्यारो परेको महसुस गर्दै आन्दोलनको स्वरूप परिवर्तन गरेको जनाइएको छ ।
उनीहरूले सबै स्वास्थ्यकर्मीहरुले बिरोध स्वरूप हातमा कालो पट्टि लगाई दोषीहरुलाई पूर्ण रुपमा नियमअनुसार पाउने सजाय नदिएसम्म आन्दोलन जारी राख्ने जनाएका छन् । आवश्यक परेमा पुनः यो भन्दा सशक्त रुपमा आन्दोलन गर्ने चेतावनी दिएका छन् ।
हालसम्म सिसिटिभी फुटेजको अनुसन्धानबाट ४ जनालाई पक्राउ गरेको र अदालतबाट ५ दिन म्याद थपिएको र बाँकी ५ जनालाई प्रकाउ पुर्जी जारी भैसकेको र २ जना पहिचान हुन बाँकी रहेको र उनीहरुलाई पनि जति सक्दो चाँडो पहिचान गरी प्रकाउ पुर्जी जारी गरि प्रचलित नियम अनुसार कारबाही गर्ने सुनिश्चितता प्राप्त भएको जनाइएको छ ।