एथलेटिक्समा मकवानपुरका तीन खेलाडी छानिए 

९ पुष, हेटौँडा । नेपालगञ्जमा यही पुस १२ गतेदेखि तीन दिनसम्म सञ्चालन हुने राष्ट्रिय जुनियर च्याम्पियनशीपका लागी मकवानपुरका तीन जना खेलाडी छनौट भएका छन् । मकवानपुर जिल्ला एथलेटिक्स संघको संयोजनमा शनिबार सम्पन्न छनौटबाट मकवानपुरका तीन जना खेलाडी छनौट भएका हुन् ।
नेपाल एथलेटिक्स संघको आयोजनामा हुने राष्ट्रिय जुनियर एथलेटिक्स च्याम्पियनशिपको लागि हेटौँडामा सम्पन्न मध्यमाञ्चलस्तरीय छनौटबाट हेटाँैडाका तीनसहित १६ जना खेलाडी छनोट भएका छन् । 
मकवानपुरबाट सर्टपुटमा सुमन नेपाली, चारसय मिटर दौडमा छिरिङ्ग लामा र ज्याब्लिङ्ग थ्रोमा सन्तराम माझी राष्ट्रिय जुनियर एथलेटिक्स च्याम्पियनशिपका लागि छनोट भएको संघका मकवानपुर अध्यक्ष एवं केन्द्रीय कोषाध्यक्ष प्रभाकर पाण्डेले जानकारी दिए । यसैगरी मकवापुर सहित चितवनबाट ४, काठमाडौँ, ललितपुर, पर्सा, र सर्लाहिका २÷२ जना खेलाडी छनौट भएका छन् । यस्तै महोत्तरीबाट १ जना बैकल्पिक खेलाडीको रुपमा पनि छनौँट भएका छन् । 
एकसयदेखि पाँचहजार मिटरसम्मको दौड, लङ्गजम्प, त्रिपल जम्प, ज्याब्लिङ्ग थ्रो, सर्टफुटलगायतका विधामा महिला र पुरुष आठ—आठजना खेलाडी छनोट गरिएको छ । 
संघका मकवानपुर अध्यक्ष एवं केन्द्रीय कोषाध्यक्ष प्रभाकर पाण्डेको अध्यक्षतामा भएको छनौट प्रतियोगिताको मकवानपुर जिल्ला खेलकुद विकास समितिका अध्यक्ष माधव तिमिल्सिनाले उद्घाटन गरेका थिए । 
छनौट प्रतियोगितामा काठमाडौ, ललितपुर, मकवानपुर, चितवन लगायत जिल्लाका ५० खेलाडीको सहभागिता रहेको थियो ।