हेटौंडामा १० जना खेलाडीको बीमा, बक्सिङ खेलाडीलाई सम्मान

१२ असोज, हेटौंडा । मकवानपुर जिल्ला खेलकुद विकास समितिले १० जना खेलाडीहरुको ५ लाख रुपैयाँका दरले सामुहिक दुर्घटना बीमा गरेको छ । खेलकुद विकास समिति अन्तर्गतको विभिन्न खेलसँग आबद्ध नाम उल्लेख नभएका खेलाडीहरुको ५ लाख रुपैयाँका दरले सामुहिक दुर्घटना बीमा गरिएको हो । 
खेलकुदको दौरानमा हुनसक्ने दुर्घटनालाई ध्यानमा राख्दै खेलाडीहरुको बीमा गरिएको मकवानपुर जिल्ला खेलकुद विकास समितिका अध्यक्ष भेष खड्गीले जानकारी दिए । मकवानपुरमा खेलकुदको गतिविधि बढ्दो क्रममा भएपनि खेलाडीको उपचार लगायतका सुरक्षामा भने कसैले ध्यान नदिएको उनले बताए । 
धेरै खेलाडीहरु घाइते भएपश्चात उपचार खर्च गर्न नसकेर त्यसै बस्नुपर्ने अवस्थामा रहेको उनले सुनाए । यस्तै मकवानपुर जिल्ला खेलकुद विकास समितिले काजकिस्तानको अस्तान शहरमा हुन लागेको एसियन जुनियर तथा युथ बक्सिङ प्रतियोगितामा ५० केजी तौल समूहमा छनौट भएकी मकवानपुरकी एक खेलाडीलाई नगद ८ हजार रुपैयाँसहित सम्मान गरेको छ । 
हेटौंडा १४ निवासी रोश्नी घलानलाई नगद ८ हजार रुपैयाँसहित सम्मान गर्दै प्रतियोगिताको निम्ति शुभकामना दिइएको हो । कार्यक्रममा मकवानपुर जिल्ला खेलकुद विकास समितिका कार्यालय प्रमुख माधव कोइराला, बक्सिङका प्रशिक्षक लालबहादुर पौडेल, पत्रकार महासंघ मकवानपुरका अध्यक्ष मणिराज गौतम लगायतको आतिथ्यता थियो ।