पब्लिक स्पिकिङमा नवलपुरकी पौडेल प्रथम

१६ असोज, हेटौंडा । हेटौंडा जेसीजले आयोजना गरेको भाषणकला पब्लिक स्पिकिङको चौथो संस्करणको उपाधि नवलपुरकी यमकला पौडेलले जितेकी छिन् । सोमबार हेटौंडामा भएको फाइनल भिडन्तमा अन्य ९ प्रतिस्पर्धीलाई पछि पार्दै विजयी भएकी उनले नगद २५ हजार रुपैयाँसहित ट्रफी र प्रमाणपत्र प्राप्त गरिन् । 
पोखराकी सुष्मा आचार्य द्वितीय र नवलपुरकै पुजा पराजुली तृतीय भए । उनीहरुले क्रमश ः नगद १५ हजार र १० हजार रुपैयाँसहित ट्रफी र प्रमाणपत्र प्राप्त गरे । फाइनलका प्रतिस्पर्धीले कहाँ छ खुसी भन्ने विषयमा आफ्नो धारणा राखेका थिए । 
विभिन्न चरणमा अनलाइनमार्फत देशैभरका सहभागीबाट फाइनलमा १० जना प्रतिस्पर्धीलाई छनौट गरिएको प्रमुख निर्णायक प्राध्यापक घनश्याम घिमिरेले जानकारी दिए ।
विजेता तथा सहभागीहरुलाई नेपाल सरकारका उपप्रधान एवम् गृहमन्त्री नारायणकाजी श्रेष्ठ, आयोजक हेटौंडा जेसीजका अध्यक्ष श्रवणकुमार बर्तौला लगायतले नगद तथा पुरस्कार हस्तान्तरण गरेका हुन् । 
मन्त्री श्रेष्ठले पछिल्लो समय युवामा नकारात्मक विचार एवम् स्वभाव बढ्दै जानु दुःखद् भएको धारणा राखे । मानिसहरु आफू आफैं जस्तो नहुँदा नैराश्यता एवम् दुःख बढ्दै गएको उनको भनाई थियो । कार्यक्रमका प्रतिस्पर्धीले बोलेका कुराहरु व्यवहारमा उतार्नु आवश्यक रहेको मन्त्री श्रेष्ठको सुझाव थियो ।