अभिभावकको जिम्मा लगाईए विद्यार्थी

Google Photo

११ पुस, हेटौँडा । मकवानपुर प्रहरीद्वारा मंगलबार विहान नियन्त्रणमा लिईएका २० जना विद्यार्थीलाई अभिभावकको जिम्मा लगाईएको छ । प्रहरीले अभिभावक, शैक्षिक संस्था र विद्यार्थीसंग सम्बन्धित युनियनहरुको रोहवरमा छलफल गरी उनीहरुलाई अभिभावकको जिम्मा लगाएको हो ।
आगामी दिनमा यस्ता गतिविधि नगर्ने सर्तमा उनीहरुलाई छोडिएको र आगामी दिनमा यस्तो गतिविधि दोहोरिए कानून अनुसार कारवाही अघि बढाउने मकवानपुरका प्रहरी नायव उपरीक्षक दिलिपराज झाले बताए । प्रहरीले विद्यालय वा अन्य जुनसुकै पोशाकमा रहेर पोशाकको मर्यादा विपरितका गतिविधिमा संलग्नहरुलाई नियन्त्रणमा लिई ‘केही सार्वजनिक अपराध ऐन’ अन्तरगत मुद्धा चलाउने अभियान शुरु गरेको झाको भनाई छ । 
मंगलबार विहान मकवानपुर बहुमुखी क्याम्पस र सिद्धार्थ उच्च माविका १४ छात्रा र ६ छात्रलाई नियन्त्रणमा लिएको मकवानपुरका प्रहरी नायव उपरीक्षक दिलिपराज झाले बताए । क्याम्पस पढ्न भनेर घरबाट हिडेर पक्राउ परेका उनीहरुमध्ये कतिपय सामाजिक मर्यादा विपरितका गतिविधि गर्दै गर्दा पक्राउ परेको प्रहरीको भनाई छ । 
नगरका विभिन्न क्षेत्रमा अब प्रहरीले यस्ता गतिविधिमा निगरानी बढाउने झाले जानकारी दिए ।

यो पनि पढ्नुस्

मकवानपुर प्रहरीद्वारा २० विद्यार्थी नियन्त्रणमा