१२ नम्बर वडाको काम अब आफ्नै भवनबाट

१९ असोज, हेटौंडा । भाडाको घरबाट जनताको सेवा दिँदै आएको हेटौंडाको १२ नम्बर वडा कार्यालयले आफ्नै वडाबाट सेवा दिन सुरु गरेको छ । बिहीबारबाट वडा कार्यालय आफ्नै नयाँ भवनमा सरेको हो । 
हेटौंडा उपमहानगरपालिकाले एक बर्ष अघि ठेक्का मार्फत निर्माण थालेको भवनको बिहीवार उद्घाटन गरेसँगै वडा कार्यालयले आफ्नै भवनबाट सेवा सुरु गरेको हो । भवनको हेटौंडा उपमहानगरपालिकाका मेयर मीनाकुमारी लामाले उद्घाटन गरेकी हुन् । 
नवनिर्मित वडा भवनको उद्घाटन गर्दै लामाले भवनसँगै जनतालाई दिने सेवा गुणस्तरीय बनाउने तर्फ ध्यान दिन अनुरोध गरिन् । भवन निर्माण हुन बाँकी वडाहरुमा पनि यस वर्ष वजेट विनियोजन गरिएको उनले जानकारी दिइन् । 
पदमपोखरी खानेपानी तथा सरसफाई उपभोतmा समितिले उपलव्ध गराएको २ कठ्ठा जग्गामा भवन निर्माण भएको हो । उपमहानगरपालिकाको ७० लाख रुपैयाँको लागतमा भवन निर्माण भएको १२ नम्बर वडा कार्यलयका सचिव रामलाल थिङले जानकारी दिए । 
१२ नम्बर वडाका कार्यबाहक अध्यक्ष ज्ञानबहादुर श्रेष्ठको अध्यक्षतामा भएको कार्यक्रममा वडा सदस्य रुक्मिनी गोङ्बा, उपमहानगरपालिकाका शहरी तथा पूर्वाधार महाशाखाका प्रमुख सत्यनारायण शाह, सुनौलो टोल विकास संस्थाका अध्यक्ष महानन्द सापकोटा, पदमपोखरी खानेपानी तथा सरसफाई उपभोक्ता समितीका अध्यक्ष टोलप्रसाद दंगाल लगायतले मन्तव्य व्यक्त गरेका थिए ।